杨飞飞走了，带走了阿拉一代人个思念。杨飞飞个委婉糯声个唱腔，我是忘也忘勿脱，会永远记垃拉心里向，伊个声音，带拨我交关童年个快乐。

　　介许多声音留垃拉我个记忆当中，但有一种声音会拿我带回到老早个辰光，迭个就是杨飞飞个声音。记得老底子夏天介辰光，阿拉屋里窗门前头吊了一只小竹笼子，里向个叫哥哥勿停个叫，热头浪吵得人心里烦煞，更让人感觉溽热难耐，我常常会睏了竹榻浪，听隔壁邻舍屋里向收音机传来丝丝缕缕个杨飞飞声音，葛末一记头觉着邪气清凉适意。还记得我小辰光生毛病了，勿好去上课了，阿拉阿爸个同事拿自家屋里个一套唱机带唱片借把阿拉屋里，搿个年代迭是稀罕物，我就天天垃拉屋里手摇唱机听唱片，听个是杨飞飞个《卖红菱》，悠扬个江南丝竹声、糯甜个上海方言唱腔直播种进我幼小个心灵，我老入迷个，反复听，拿手摇唱机摇到手发酸为止，叫啥咾拿唱机个发条断了又换上新个，唱针侪磨平再一包包换，不过上海唱片厂胶木唱片老经磨个，依旧然挺括如新，声音老清爽个。乃末我反反复复听，听也听勿厌，听到后来交关唱段侪会哼哼了，勿知勿觉我个毛病也好了。记得阿拉屋里个老房子面对是黄浦江，每逢黄浦江涨潮水，阿拉姐妹道里会扑了三楼窗门向外张望，看黄浦江浪个轮船来回穿梭，听黄浦江浪轮船长长个鸣笛声，有常时还会得传来老船长透过高音喇叭个吆喝声。隔壁本地阿奶屋里搿一只老式收音机里传来杨飞飞的沪剧，在丝竹伴奏的飘渺声中。七月流火天,虽然下半天会落一阵雷阵雨，但傍晚气温照例又上去了，弄堂乘风凉辰光，就会听到杨飞飞糯软悠扬让人伤感个声音：“翻上高山把路赶，眼前已是山河湾。”阿拉边揉着吃饱西瓜个小肚皮，边听阿拉姆妈讲解杨飞飞主演的《为奴隶的母亲》个故事。

　　今朝我听到委婉如梦幻般声音，就会感觉自家又回到童年辰光，让我着迷让我如痴如醉，让我眼泪水溚溚滴。杨飞飞个声音是属于上海个，也是阿拉上海人个乡音。