讲了牛顿炒股翻跟斗故事，还想再讲一则马克思炒股比牛顿来三个故事。

　　迭个马克思，就是人人晓得个大胡子马克思，伊创立了马克思主义，伊还是一位伟大个经济学家，写过一本《资本论》，到今朝全世界还承认伊是真理。

　　大家要晓得，马克思呒没固定工作，靠替报纸写点文章生活，老困难格，有辰光是几片面包、一杯开水当中饭，常常吃了上顿呒没下顿，面包店老板一直上门来讨债。伊个太太燕妮是大户人家出身，嫁拨了马克思以后常常到当铺里跑进跑出，日脚真是难过。迭个辰光，英国伦敦举行第一届世博会，朋友邀请伊拉全家去参观，但是马克思个两个小囡因为呒没鞋子，勿能出门，只好寻个理由谢绝。幸亏恩格斯勿断寄钞票拨伊拉，才勿让马克思一家勿至于饿肚皮。

　　当时，马克思个身体也勿好，医生劝他多歇歇，覅做紧张个脑力劳动工作。马克思希望通过炒股票改善一下，可惜呒没本钿。1864年5月9日，马克思个老朋友沃尔弗生病去世。伊晓得马克思日脚勿好过，留下一份遗嘱：拿一生个积蓄900英镑送拨马克思。迭笔钞票，可以供伊过两年衣食无忧个日脚。马克思认真研究了英国刚刚公布个《股份公司法》，预见到英国个股票会辣短期里大涨。伊决定投资英国股市，一为休闲，二为体验一下股民生活，三为试试自己手里搿把牛刀，到底灵勿灵。

　　伊马上写信拨恩格斯，请伊帮忙，赶快拿沃尔弗个900英镑汇过来。恩格斯用了6天功夫，抓紧办好沃尔弗个遗产交接手续，伊拨马克思回信说：“侬想得到遗产中迭部分钞票，马上可以拿到。另外，我还可以送侬50英镑。”7月15日，马老拿到了汇来个950英镑。

　　有了炒股本钿，马克思心情很好，先勿急忙下水。伊每天买一份《金融时报》看看，分析伦敦“金融指数”个变化。轧准苗头，拿600英镑分四趟购买了四种勿一样个股票。当股票涨到一定时机后，伊见好就收，毫勿犹豫个拿四种股票抛脱。结果，勿到一个号头，伊用600英镑个本钿，赚了400英镑。正是：马克思出手炒股票，马到成功。

　　马克思高兴得勿得了。因为400英镑勿是一笔小数目。当时伊为英国《新闻报》写社论，每篇社论的稿费只有1英镑，而且常常拖欠。现在手头有了400英镑，加上沃尔弗送伊个900英镑，让伊辣后头几年里，可以定定心心写《资本论》了，伊个太太搭小囡也有牛肉吃了。

　　马克思一生一世，就炒过迭个一次股票。事后伊谈起搿段炒股经历，交关开心。伊写拨了娘舅个一封信里说：“医生勿许我从事紧张和长时间个脑力劳动，所以我——搿趟让侬大吃一惊——做起投机生意来了……赚了400多英镑。”后来，有朋友劝马克思再炒几趟股票，但伊想了一想，决定勿做了。伊讲，炒股虽然赚了一把，但自家最重要个事体还是写作。到股市里白相一趟可以，但迭个地方风险忒大，证交所勿是“资本市场”，而是货真价实个赌场，勿好沉迷进去。伊还讲，沃尔弗送了我一大笔钱，迭个是救命钞票，赚了一把，还是落袋为安，万一弄得勿好，血本无归，葛末就太对勿起老朋友了。搿一点，就是马克思比牛顿来三个地方。