老底仔家家人家小人侪交关，经常会打破碗盏，不过就是顶顶粗糙个蓝边碗，只要呒没粉粉碎，就摆辣海等钉碗补锅个来。

　　钉碗补锅个担子老重，一头担风箱，一头挑只炉子，还有各种家生挂满扁担两头。一路走一路喊“钉碗……补喔……”，因为担子重，叫得辰光长了难免衰瘏【sadhu】，就辣拉担子前头挂几片钢宗，担子一晃动，钢宗片就“嗪铃嚓、嗪铃嚓”一路响过来，大家一听就晓得是钉碗补锅来了。现在个年轻人老难想象一只普通饭碗值几钿，有必要补？有，我敢讲伊个辰光大部分人家屋里或多或少侪有补过个碗。补碗，还真是个精细生活，需要熟悉“瓷性”，所以补碗个侪是江西人。有人招呼，伊便撂下担子朝小板凳上一坐，膝上铺块布，操起一把有点像二胡个锯子，弓绳一拉当中个木柱就转动起来，木柱头上有一枚钢钉，辣拉碗告仔碎片上侪钻几只相对应个小孔，迭种轻重缓急个本事相当高超，再薄个瓷片也勿会钻穿，而且大小距离侪搭卡上去个骑马钉严丝合缝，骑马钉是当中阔两头尖个黑色铁片，几只骑马钉就好拿碎片告饭碗扒得扎扎实实，勿用胶水，冷水热汤统统滴水屋漏。补一只破碗最多角把洋钿，可见伊个辰光，再高超个手艺也就为了糊口，大家侪安份于用勤劳调换安逸，老老实实勿大做发横财个梦。

　　我一直想寻只补过个碗囥起来，收藏起来，呒没元青花或者清彩釉，假使能有只补丁碗，倒也是收藏了一个时代。

　　补锅要复杂点，迭搭讲个补锅，是专门指用来炒菜个铁锅子。修钢宗锅子、铜吊、汤婆子、铅桶、畚箕是铅皮匠个生活，搭仔钉碗补锅勿搭介。炒菜个生铁锅用得日脚长了会有细小个漏洞。补锅，风箱、炉子就要上场了，拿铁锅上有漏洞个地方先烧红，同时烧得通红个还有一粒像小纽扣个铁块，老师傅用弯头小铁钳把小铁块迅速揿辣漏洞个地方，压紧打实，红彤彤个融合辣一道，等到凉下来漏洞就呒没了。有辰光一只锅子会有好几只漏洞。

　　补碗个还可以为饭碗、碟子、甚至调羹上打印姓氏，老底仔人家办红白喜事，多数侪勿上饭店，勿像现在碰勿碰高档酒店里海威。屋里向比较宽敞个就拆了床铺，腾出点地方摆上几桌，呒没地方个就辣拉门口弄堂里搭只棚。自家个碗碟再多总归是勿够个，所以就会东家借、西家凑，反正每家人家个碗碟上侪有姓氏，勿会弄错。工匠用小巧个锤搭仔凿，用点线法，辣拉碗个里侧敲出姓氏来，抹上点黑色永远汏勿脱，真是“没有真功夫不揽瓷器活”。说补碗，有一点很值得品味，江西景德镇是瓷都，可是补碗个又侪是江西人。按照现在个经济理论，破了掼脱越多，生产方个市场就越大。看起来伊个辰光老百姓个单纯善良，很难用现在个逻辑去衡量。