曾国藩是晚清大官，最后做到湘军最高统帅。伊中进士后，留辣北京做翰林院检讨，是个七品官，相当于今朝个局级干部。伊身边有个佣人，名叫陈升，却看不起伊，经常搭伊吵相骂。曾国藩气得勿得了，写下一首诗，题目叫做《傲奴》，诗里向有搿能几句：“胸中无学手无钱。平生意气自许颇，谁知傲奴乃过我!”

　　“傲奴”意思是看勿起主人个奴才。我平时常常意气高昂，啥人晓得佣人比我还要高傲。“胸中无学”是曾国藩谦虚，呒没学问，哪能辣皇帝身边起草文章、校勘书史，但是，“手无钱”倒一点勿假。伊年薪只有45两银子，外加“恩俸”告“禄米”，一年不过135两银子。算落来，一个月只有11两多点银子。伊辣北京呒没官邸，租房住，月租八千文，全年66.95两，占薪俸一半，搭今朝个“北漂族”差勿多。别个各项支出也蛮结棍，包括服装、请客吃饭、车马费、日常生活开支等，加起来，合计白银608.46两，年亏损为478.51两。辣家书中，伊一直叹苦经：“我从去年以来，日日想回家探亲。但一直回勿了家，主要是缺钱，一年进账一千，回来一趟路费就要数百，实在有点心慌。”有辰光有点灰色收入，但数量勿多，依然入勿敷出。

　　后来，伊外放到四川担任乡试主考，搿是一个好差使，但要添置几箱子行头，口袋里空空，只得买几套旧衣裳，胸口戴个蜜蜡朝珠也用假货充数，勿料被人看出，只好老老面皮混过去。因为手头拮据，常常靠借贷过日脚，对佣人出手自然勿大方。穷困而脾气又大，佣人陈升一直看勿起伊，常常触伊霉头，有次一语勿合，陈升脱曾老爷大吵一场，跳槽走了。

　　曾国藩到北京做官前，专门去探望过几位老娘舅。伊个大舅60多岁了，仍旧住一所破房子，靠种菜维持生活。伊个二舅江永燕送伊走时，搭伊预约：“外甥做外官拉，阿舅来当伙夫，好？”曾国藩呒没搭腔。五舅一直送伊送到长沙，临别握牢伊手讲：“明年我送外甥媳妇来京。”曾国藩搭伊挥挥手讲：“京城苦，娘舅勿要来。”后来也一直呒没接伊拉到北京享福。

　　佣人跳槽，勿影响曾国藩升官。伊后来升任两江总督，官做到省部级了，伊穿个鞋袜仍旧由妻子和儿媳、女儿手工做。每日夜里曾国藩批阅公文，全家娘儿们辣麻油灯下纺纱织麻。通常伊每顿饭只有一个菜，绝勿多设，菜里多摆点辣椒，好下饭。晚年伊做到湘军最高统帅，一年净收入可达五千四百两银子，带兵十二年，合法工资收入可达六万四千八百两，但伊宁可将大把银两施舍别人，也勿寄回家里。

　　伊搿能做，勿是为了摆摆样子，而是立志勿靠做官发财。1849年3月21日，做到正部级个礼部尚书个曾国藩写拨阿弟个家信中讲：“我30年以来，一直以做官发财为可耻，口袋里藏金子给子孙可恨，所以立下誓言，一定不靠做官发财，苍天在上，决不食言。”

　　曾国藩好家风拨子孙带来了真正个好处。伊个儿子曾纪泽勿靠老子个名气吃饭，到曾国藩死后才出仕，成为一名有名气个外交官；另一个儿子曾纪鸿一生钻研数学；孙子曾广钧中进士后，一直窝辣翰林院里做学问，勿出来做官；曾孙、玄孙辈大都出国留学，伊个三、四代都做到洁身自好，实现了曾家“长盛不衰，代有人才”个遗愿。