我从小生长辣拉上海，58年支内去了外地。上海拨我个记忆实在是忒多了。现在是秋天，我就会得想起街头浪向个香炒糯米热白果。

　　炒白果个人，大多数戴一顶黑色或者棕色个帽子，腰浪围一块布，挑仔担子走街串巷，到了一个自己认为恰当个地方停下来，往炉子里塞进几块柴爿，然后炒起白果来，嘴巴里向随即唱起了招徕顾客个“山歌”：“香炒——糯米热白果哎——，香是香来——糯是糯哎——，一粒白果——两粒大哎——，两粒白果——鸽蛋大哎——”

　　迭个街头一景，老上海是侪看见过个，至于迭个“山歌”，更加忘记勿脱，甚至辣拉肚皮里向也会得暗暗个跟仔哼唱起来，悠扬绵长，韵味十足啊。有个卖白果个老兄，自编自唱中还会得添进一眼“野味”。侬迭个辰光就是有心事，眉头紧锁，听辣也会得笑起来，“……小伙子吃了——力气搭哎——，小姑娘吃了——肚皮大哎——”，有个调侃更加发噱，但是并勿十分出格，上海到底是一个比较文明个地方，是唱勿出来个。

　　我当年住辣普陀区个潘家湾，经常到康定路个阿姨屋里向去。有一次，一个卖白果个老兄唱了一句“五分洋钿——吃到曹家渡哎——”我当时心一动，我去个就是曹家渡，就拿出五分洋钿拨了伊，伊接当场帮我包了一个三角包。我捏捏三角包，搭伊寻开心：“迭个一眼眼物事，哪能吃到曹家渡啊？”伊嘻嘻一笑，讲：“嗨嗨，唱总归是搿能介唱个。”说完打开三角包，再添进几粒。

　　热白果确实又香又糯，邪气好吃。我“呱嗒呱嗒”咬开剥壳，一连吃了十几粒。迭个辰光，正巧走到16路电车站边，又正巧车子到站，我拿三角包一团就上了车。上车之后，白果勿吃了。因为辣拉车子浪，我是从来勿吃东西个。不过，一下车，因为还要走一段路，我就要紧勿煞拿白果拿出来。味道交关好啊，迭个情景，至今还记忆犹新。