小区里一高五矮六幢楼。人口个流动一直呒没停歇过。上个月搬脱几家上海人。乒乒乓乓装修一场，搿个月就搬进来几家外地人。伊拉辣拉此地要修练成为新上海人。大门口、电梯间、走廊里是各地方言大展示。搬进搬出也搬来了勿少外国人。伊拉是标准个打一枪换一个地方，大多数是租房子住个。日本人、韩国人多一点，高鼻头、蓝眼睛个欧美人少一点。还有从印度、孟加拉来个南亚人，先生是套了西装，太太还罩了长袍、披了围巾。小囡会讲一点中国话，是天天去幼儿园里学会个。大人还勿来三，开口打招呼还是“英格立须”。新近住进来个小夫妻，男个是土耳其人，女个是俄罗斯人。卖相老好，一个是007，一个是安娜卡列尼娜。007会讲普通话，很标准个京腔，伊已经来北京好几年了，眼门前是到上海滩来发展。早夜辣大楼门口见面，007是“早上好”、“晚上好”，阿拉几个退休个老土地是“侬早”、“侬好”来应答。南腔北调，攀谈勿起来。我决定教几个外国人上海闲话，从打招呼学起，每个礼拜学一句，免费，勿要交学费。想勿到老外个兴致比阿拉还高。早上、夜到个上海闲话托福课堂就随时随地辣拉小区里开出来哉。

　　“早上好”，上海人讲是“早浪好”。碰头打招面个辰光，上海人还会问一名：“饭吃过！”搿个一句个意思也是“侬好”，重点勿是真个盘问侬吃过点啥。007觉得很新鲜，搭伊讲解了好几趟，算伊学会了。“再见”、“回头见”个上海闲话是“晏歇会”。夜里向分手是“明朝会”。过几天再见面是“隔日会”、“改日会”。马上又会见面是“一歇会”。搿点上海闲话对老外来讲太复杂了。007算聪明个了，伊也只学好了“晏歇会”。“晏歇会”几乎成为伊个口头禅，伊还会用伊个可爱表情来配合一记。讨人欢喜。

　　还教会了一个日本老头讲天气个闲话。普通话“天晴了”，上海人讲“出太阳了”。普通话“下雨了”，上海人讲“落雨了”。一天阵头雨瞎结棍，日本人淋湿了，冲进门厅直叹：“大下雨了！大下雨了！”把“下大雨”讲成了“大下雨”，创造精神也太丰富多彩了。后来日本老头个绰号就变成了“大下雨”。伊听到人家喊伊“大下雨”，还是交关捂心个，还会用“落大雨哉”来应答侬，一面孔得意。现在我拿普及上海闲话当成一个业余爱好。无论碰见外地人、外国人，一有机会就教授伊拉几句,让大家晓得，辣上海滩浪讲出正宗上海闲话还是最时髦个生活。