一九六六年是我垃拉部队超期服役个第一年，按规定我可以享受每年一次个探亲假了。

　　部队个探亲假勿是想请就能够请个，要垃拉勿影响战备与训练个前提下统一安排。从农村来个战友侪希望安排垃拉农忙个辰光，好帮屋里做点事体，像阿拉当时还呒没成家个城市兵就勿大讲究，啥辰光侪可以。

　　我个探亲假被安排垃拉搿年八月初，迭个辰光“文革”已经开始了。临走个辰光，指导员特特为为关照我，现在地方浪向比较乱，要我当心点，闲话勿要瞎讲八讲，尤其勿要参与人家个派性活动。

　　回到上海后，果然是大字报满天飞，啥个“炮轰”、“揪出”、“打倒”等字眼，听听也吓势势。后来想想，阿拉是现役军人，的的刮刮个革命派，吓点啥？于是，我走访几位毕业后被分配到商店工作个同学。有一天，我顺便向一位同学打听绰号叫“黑皮”个同学，伊讲“黑皮”垃拉嘉定一家单位工作，随后就用店里个电话帮我接通“黑皮”。

　　“黑皮”是我读书辰光最要好个同学，我参军个辰光，伊还送我一本日记簿作为纪念。伊一听是我，开心得来垃拉电话里哇哇乱叫，因为是人家单位电话，只好长话短讲。末了，伊要我无论如何到伊单位碰个头，我讲路介远，交通又勿便当，要伊请假。伊讲现在侪垃拉“造反”，啥人敢请假？经勿住伊再三挜【ok哀】求，我就答应了。我有点弄勿懂个是，老早读书辰光伊天勿怕，地勿怕，现在哪能连假也勿敢请了呢？何况我还是从千里之外赶回来个。

　　第二天一早出门，一直到中浪才好勿容易寻到伊单位。

　　“黑皮”一看到我，就马上领我去食堂，一路浪勿管碰着啥人，伊侪要来煞勿及向人家介绍，讲我是伊最要好个同学，也是伊最要好个朋友。用餐个辰光，伊偷偷叫告诉我讲，“文革”开始后，有人写大字报揭发伊有一位远房亲戚垃拉台湾，虽然搿位亲戚伊看都呒没看到过，更加谈勿上有啥联系，但伊还是一日到夜提心吊胆，勿晓得拉里一天会被当成“牛鬼蛇神”或者是“台湾特务”揪出来。伊所以要我到伊单位碰头，就是想让大家晓得伊有一个解放军同学，好沾沾我搿个解放军个光，为伊自家壮壮胆。

　　我复员后，直到“文革”结束两个人再次碰头个辰光，伊告诉我，“造反派”后来对伊呒没再“深挖”，只是让伊写了份“认识”。搿个结果是勿是同伊当时有我搿个解放军同学有关，恐怕只有天晓得了。

　　我探亲个辰光，还发生过一件邪气好笑个事体。

　　老早阿拉屋里后门对面有对老夫妻，原本开有一家小小个加工场，公私合营后并拨一家工厂，成为拿股息个资本家。伊拉屋里有台德国制造个照相机，我读书辰光曾经问伊拉借过。搿次探亲，因为影院剧场侪关门了，啥个娱乐活动侪呒没，我就问伊拉借来拍白相。我假期将满准备归队，去还照相机个辰光，呒没等我谢伊拉，伊拉倒连忙谢谢我，弄得我莫名其妙，借人家物事反而拨人家谢，搿算啥个道理呢？

　　原来，我借走伊拉照相机个当天夜里，伊拉单位技校个一群“红卫兵”上门抄家来了，伊拉屋里个橱橱柜柜，坛坛罐罐统统被翻了个底朝天，连本来已经摇摇晃晃个破沙发也侪“开膛破肚”了，最后只抄走几本搿些人认为是“毒草”个书，但伊拉屋里最贵重个照相机因为借拨我了，总算躲过一劫得以保留，所以伊拉要谢谢我。

　　一九六七年，因为参加“支左”，部队呒没批准我探亲。再后来我就复员离开了部队。所以搿次是我垃拉部队第一次，也是最后一次个探亲假。探亲本来邪气平常，因为发生搿两桩事体，我至今一眼忘记勿脱。