上海人欢喜体育。依成绩来讲，上海一向是全运会上个金牌大户，勒奖牌榜上是常常孵勒前三名。依项目来算，足球、篮球、排球三大球也常常是全国冠军宝座上个常客。田径场里个跳高、跨栏，上海人朱建华、刘翔都创造过世界纪录。游泳池里、射击场里、乒乓球房里是生产世界冠军个摇篮。近几年来，交交关关世界个顶级赛事都在上海滩落了户，有了上海个户口簿了。上海人还神气过个是有上海个高度姚明、上海个速度刘翔和上海个强度王励勤。当下上海个全民健身运动也搞得闹闹猛猛，大家去运动是热门话题。体育已经是大上海个一张城市名片。老早仔上海人出客穿一身西装算是出风头、扎台型了。现在上海人披一身名牌运动服去休闲健身才算时髦、才算时尚。发个短讯讲“我在健身房”要比发“我去酒水馆”更加令人骄傲、叫人眼热。

　　阿拉小辰光读书，体育成绩好可以轧进校队、区少年队个同学就是学堂里个明星。套上校队运动衫裤马上提高侬勒操场上个回头率。就是脚上穿一双回力牌个高帮篮球鞋也可以招摇过市。伊个辰光，回力牌球鞋九块八角一双，可以算是老价钿了。上海闲话里有关运动个讲法是洋泾浜英文个集散地。足球个守门员，上海人称为“搞尔”。“啥人做搞尔？侬去侬去！”搞尔，英文goal个音译。传球是叫“派司”。“快点派司过来！此地是空档！”打乒乓球叫打台球。打起台球来，洋泾浜闲话更加多。擦边球叫“脱去”。连接乒乓球叫“道勃儿”。重新再打一盘，再过一次叫“厄隑五”。马路浪私人开个乒乓房、桌球房叫弹子房。桌球现在称为斯诺克，老早是叫落弹。会打上几杆落弹个就称得上是克勒、老克勒了。当时个淮海路、瑞金路口就有一家弹子房，里向有乒乓台、桌球台。老板就是一位老克勒，坐勒账台里搭进来打球个朋友算辰光收铜钿。一分钟勿少算，一分钟勿多算。“厄隑、厄 隑”了，就再加一个钟头白相。打落弹个老克勒们还常常咬一根外国雪茄烟，吞云吐雾，功架摆足，噱头势十足。现在此地变成了13号地铁站。经过路过搿搭，令人怀旧。

　　我读过六年书个向明中学是市里个篮球重点学堂。男高、女高、男初、女初篮球队一直称霸市里、区里中学生篮坛。连市里中学生男篮、女篮也寄读勒里向。五十年过去哉，当年个校队迭个月里要重聚一堂、重温旧梦了。有啥个好白相个故事听到，下一趟会写下来“派司”拨各位个。