上海闲话里对“找茬”搿档事，有多种说法，表现出来个程度也各有勿同。一般来讲，就是“捉扳头”，再刻薄一点，就是“扳掐丝”，好比“豆腐里向挑骨头”,有点硬劲寻毛病个意思。而更加严重个，要算“寻吼势”了，有点“恶势做”个味道。至于“装榫头”、“掘壁洞”之类，虽然也有“找茬”个含义，但更多个有类似“挖墙脚”、“栽赃”等深一层意思，属于“硬装斧头柄”了。