迭个是我读初中辰光（1955—1958）白相个游戏。要有一只篮球，搭仔比较宽个场地，所以学堂里向课外活动时经常白相。十多个人一道白相。先有一个人拿球往天浪抛，伊抛到高空，就喊一个人个名字，拨辣喊着就来接球。如接牢了，就再由伊抛球喊别人个名字；如果接勿牢，球落地，伊要豪燥拿球拾起来。拾着球，就喊一声“停！”球辣高空个辰光，其他人侪四处逃散。听到“停”，大家侪辣原地立停，拿球个人就拣一个顶近个目标，用球厾伊。厾着，被厾个人就记一分；厾空，厾个人记一分。接球个人为争取主动，要尽量拿球接牢，接勿牢就要豪燥拾球，豪燥喊停，勿然大家逃远了，伊就厾勿着了。游戏继续进行，由记一分个人抛球。啥人先被记到三分，就要被处罚：扑辣一个规定个地方，拿屁股撅起来，让人家用篮球厾屁股。每人辣浪规定个距离之外厾一记。迭个就叫“吃弹簧屁股”。后来，勿晓得哪能，迭个闲话拨大人接过去了。辣弹硌路上踏脚踏车，屁股颠痛，叫吃弹簧屁股。汽车碰着凹塘，“格登”一记，也叫吃弹簧屁股。