孔明珠

　　换季了，乘太阳当头，礼拜天拿被头、垫被、羊毛地毯侪晒出去。曝晒辰光，像煞听到棉毛织物当中空气膨胀个“滋滋”声。日头将落，要拿伊拉收进来了，突然，一把藤拍恍惚出现垃拉眼门前。是呀，搿种辰光我需要用藤拍来拍打被头，拍打地毯，除了拿灰尘拍走之外，还可以拿被头拍松，清清爽爽囥起来明年再用。

　　藤拍算哪能一种工具，现在个小年轻已经勿晓得了。伊像网球拍大小，是用藤编起来个，头浪向像中式盘花介扣摊平一样，绞花绞得蛮好看，手柄也是用藤弯起来做个，做工考究个用棕绳密密麻麻绑起来，老结实耐用个，还可以传代唻。阿拉屋里个藤拍帮鸡毛掸帚一样，侪是用一根绳子穿起来，吊垃拉房间墙壁浪向待用。垃拉我个印象当中，藤拍帮鸡毛掸帚还是玩具，爸爸姆妈上班去了，我帮阿哥白相，两家头拿拉手里打来打去，到结果总归是我拨男小人弄痛，哭出乌拉收场。呒没想到，当我垃拉微博浪向写了一段怀念藤拍个文字后，交关博友发言，控诉藤拍迭样物事带拨伊拉童年个心理阴影。原来，过去上海老多家长是用藤拍教训小人个。小朋友一勿听话，身边最顺手打人个工具就是藤拍。想想也是对个，藤拍打人痛是痛，勿会老痛，因为伊是空心个，又勿是铁榔头，也勿是汏衣裳搓板介实心个物事，爷娘打小囡主要是吓吓伊，又勿是真个要打伤伊，对伐？现在城市里手工产品越来越少了，藤拍搿种低成本个工具买勿到，要跑到郊区或者邻近个小镇去寻了。邻居有女结婚，怀旧个老妈特地去觅了把藤拍拨囡当嫁妆。后来，真正派上用场个机会老少。等到囡儿【ng】自家生出小人以后，搿把藤拍也变成了一把家罚工具。好笑个是，现在年轻妈妈更加勿舍得打小人了，只是用来搳【huaK】来搳去，摆摆做娘个威势罢了。小朋友呢，睬也勿睬，哈哈大笑，屋里向好白相物事介许多，搿把破东西也轮勿到当玩具呢。

　　黄昏搿辰光，我立勒窗口看夕阳，有一股莫名忧伤，远去个藤拍帮童年搭快乐，侬还会再回来伐？