七月流火，伲宅浪有一间住宅最风凉。门框顶浪有人物雕塑个仪门头，门搭周围个墙连辣一道，阿拉小囡叫伊“墙门间”，村浪识几个字个先生叫伊啥个“绞【gao】圈房子”。迭种上海民居比石库门漂亮大气，有资格同广东开平碉楼、福建南靖土楼媲美。

　　墙门间大门朝南，正屋前后两进各五间，再加东西各两间厢房。房屋外壁相连，成为外墙，外墙覆盖竹篱笆，既保护砖墙，又防小偷掘壁洞。勿知为啥每间屋子只开一扇窗户，呒没玻璃，用木条格子采光，伲叫伊“十轮窗”。屋里阴暗，也凉爽。辶半野猫个辰光，伲朝大橱后头一迓，偷偷看庭心里小朋友像呒头苍蝇转来转去，伊辣亮处，我辣暗处，哪能寻得到？等伊寻得昏头落蹱，阿拉辣陌生头从后面抱住，吓得伊哇哇叫。

　　里向头住个是大人家。文献记载讲：“五开间四厢房个一绞圈房子，自备料作，规几好银子末，肯造个哉。”（注）穷人呒没银子，家安宅宁；富人有钱，家翻宅乱。倒勿是因为每日十几个小囡拉垃屋里向乱窜，主人家嫌烦吓阿拉。里向头吊杀过女人，阴气重，大一点个男人早死，剩下来个侪是女个。有个伲叫伊三姨个，住个正房间邪气讲究，人也邪气客气，经常拿长生果、盐津豆咾啥拨伲吃。伊个阿姐就是吊杀鬼【ju】，阿姐死仔伊嫁进来，寻死觅活，勿晓得哪能男人先死脱。墙门间里向像迭种介秘密多来邪邪气，有交关伲小囡根本勿晓得。不过，搭伲小囡勿搭界，伲侪欢喜三姨。

　　夏天，墙门间里向蚊子呒没一只。我到浦西读书还心心念念放假要回墙门间乘风凉，勿过，五月份个辰光，打仗哉。浦东高桥解放战争打得最结棍，伲宅浪住仔交关国民党兵，解放军个炮弹嘘嘘响，随后来冲锋过来，据说墙门间里拼过刺刀。等我再回到宅浪，墙门间只剩几间可以住人，勿过样子还垃拉。

　　迭个民居垃拉高桥镇南牌楼厍，开发浦东刚起步，侪逢拆迁，绞圈房子个秘密侪埋进烂泥里。勿然，阿拉勿要千里迢迢去看啥碉楼、土楼，就近看看绞圈房子勿是更加扎劲？

　　注：见《松江方言教程》。