程多多

　　想想现在真是道地，每当天气出现雷电或者狂风暴雨个辰光，手机信息会及时通知大家早点作好准备。而每趟有大风雨来个辰光，我常常会回想到我小辰光所经历过个下大水个场面。

　　上海地区垃拉夏天介辰光，经常性会落阵头雨。刚刚还是蛮好个天，突然之间会得天墨赤乌黑，感觉就像夜里，顿时飞沙走石，狂风暴雨。上世纪五六十年代以至到七十年代，垃拉延庆路华亭路以及长乐路富民路等一带，由于地势老老低，加上地下排水管年久失修，碰着一有倾盆大雨，就会形成令人尴尬个局面，也就是阿拉上海人讲个“涨潮水”。有辰光雨落得邪气结棍，一歇歇功夫，整条马路像水满金山，一片汪洋哉。上面落雨，阴沟洞里龌龊水还会冒出来。当时我还是小学生，勿晓得下大水个辛苦，恨勿得叫整条被黑碴碴个水淹没个马路，当做大河浜，里向开开大兵舰。乃末看到开过来个大卡车兴奋煞脱了，轮胎边翻起来个白花花个波浪，真是波澜壮阔。活脱势像一艘军舰垃拉乘风破浪。边浪向个黄鱼车赛过鱼雷快艇，虽然卷勿起多少浪头，但还是可以看得到水花沾到来勿及逃开个行人身浪向，各种狼狈样。尤其是看到脚踏车搭卡车窄路相逢，有个辰光碰到搿个踏脚踏车个人，搿个老鬼【ju】三骑车技术勿灵，本来就抖抖歪歪，看见大卡车直冲自家过来，心急慌忙弄得勿巧，连车带人一道跌下去。浸湿一身衣裳倒是小事体，弄出交通事故来，搿就勿得了了。从七十年代初，我就住拉一楼原来个锅炉间里，一旦碰到发大水个日脚，我就如临大敌，拿浸勿起个物事豪燥朝高处摆。一定要抢垃拉水还呒没氽进来前头就弄好。等到大水退脱，房间里就像打过仗一样，乱七八糟。看看对过沿马路个人家还要作孽。老古闲话讲：兵来将挡，水来土掩。勿过啥地方来介许多烂污泥?只好有啥用啥，情急之下旧门板、跳板、板凳、木箱咾啥统统拨伊用上去了。有常时听到远近一片惊呼，只看见拖把、扫帚、畚箕、面盆、甚至烧开水个铜吊侪拿来拷浜。听听前面老远传来大呼小叫，再看看氽垃拉水面浪个木板、木箱咾啥跟了大水漂过来，就晓得前头个潮水一定蛮大个。

　　现在上海已经看大勿见涨大水了。