吴淞江进入嘉定江桥地区，河浜北半爿【bebhe】有一条小路，之字形，两车道，邪气短，走走十分钟，名气石骨铁响，叫虞姬墩路。虞姬不是自刎辣乌江边浪，此地哪能有伊个坟墩呢？

　　迭个坟墩原先辣辣江心。老早点介，吴淞江江面邪气开阔，当中横里有一个小岛，可以屯兵作战。汉楚战争，项羽打勿过刘邦，搭虞姬一道自刎。伊手下头个子弟兵侪是嘉定、松江、昆山咾啥个人，回来一讲，虞姬个二妹三妹组织仔人马要为虞姬报仇。刘邦派韩信镇压，韩信夸下海口讲，手底下虎狼兵将成千上万，伲迭只老虎要吃脱两个小小囡，譬如碾煞一只蚂蚁，捉一只老白虱。勿晓得虞姬格二妹三妹本事大得乌天野地，韩信碰到伊拉吃老酸，一天到夜吃败仗。嘉定百姓编仔一只山歌嘲笑韩信：“白菜开花嫩朵朵，蚂蚁爬山捉老虎，黄狼拨拉鸡啄煞，老白虱吃脱一只壮猪猡。”韩信下作胚，覅面孔，叫手下脱光仔衣裳赤膊出屁股上阵。二妹三妹一看，打仗哪能碰着仔流氓，难为情煞哉。搿能样子，拨拉韩信打败脱。老百姓拿俩姐妹葬辣伊拉战斗过个岛浪向。韩信要渡江挖坟鞭尸，每当登船，吴淞江就海水倒灌，怒涛汹涌，沿江百姓称伊“霸王潮”。韩信知难而退。

　　为提防汉兵毁坟，此地开始叫野鸡墩。有个文人看勿懂，做仔一首诗：“汉殿秋风雌雉啼，江东抔土拜虞姬，项刘不是争墩客，谁把墩名误野鸡？”写得仔五十六，闭仔眼睛瞎讲项刘只争天下勿欺死者。朝代更替，后首来末再叫虞姬墩。

　　搿个自然是乡下个渔樵闲话。虞姬姓啥名啥人侪勿晓得，只晓得伊是虞人（掌管山林个官）后代。勿过，搿一类传说中个虞姬姐妹侪是戎马倥偬叱咤风云个巾帼英豪，比文艺作品当中个柔肠弱骨垓下殉夫，好像更加叫人肃然起敬。

　　吴淞江霸王潮兴风作浪，毁堤荡禾，祸害百姓。明朝清官海瑞奉旨治理，辣辣河浜边浪修筑虞姬庙，显示老百姓邪气敬重虞姬。从此，风平浪静，泥沙淤积，虞姬庙被隔拉河浜南半爿，坟墩搭北岸连接。此地就叫虞姬墩，河浜边浪个水陆码头就叫虞姬墩码头，河浜北板板修筑个马路就叫虞姬墩路。

　　虞姬墩路原先只有短短三四百步路。社会发展，乡村城市化，马路隔开日永路又接仔一段，成为勿相连接个两段。近年江桥大发展，大马路横七竖八交交关，虞姬墩路夹辣当中，真像俏媚小女子，混辣辣长子当中，走近仔也寻勿到。坟墩已经平脱，勿过，老百姓口口相传个山歌，一直唱到今朝。

　　【编者语】

　　本版连牢两期刊登“搭上海有关个上海闲话”以后，读者兴趣浓厚，特别对其中个“鸡吃稻柴鸭吃谷，儿孙自有儿孙福”搿句闲话提出异议。现将答案重新更正公布。感谢读者热情参与探讨，也邪气感谢读者对“上海闲话”个厚爱。

　　上海话：牛吃稻柴鸭吃谷，各人自有各人福。 

　　又说“牛吃稻柴鸭吃谷，烂泥菩萨住瓦屋。” 

　　解释：牛又大又辛苦，却只吃稻草；而鸭子很小不干活，倒要吃谷子。指世运好坏不均，又可指人的命运好坏自有上天安排。