比如讲辣辣足球场浪任意球前组织个人墙，上海人就会叫：排门板！有辰光有人挡了自家个视线，就会有人讲：喔哟！侬勿要像排门板一样挡辣前头！老早讲一家商铺规模个辰光会得讲：搿家人家几堂排门板！一堂就是一个开间。通常个排门板要3米多高，40-50公分宽，足足有得5公分厚！迭个辰光一早起来，学生意个人【徒弟】侪会得马上去扛排门板，开店铺个门，搿个是伊拉每天要做个第一堂功课！有种夜里还要做生意个商铺，排门板浪向会有一扇小窗，夜里向只要有人敲门就可以直接做生意。

　　现在迭种样子个排门板成了珍稀物品。 寿幼森