上海开埠170年以来，体现搿个城市魅力搭内涵个文化品格搭精神气质，积淀下来潜移默化，成为上海市民个基本民风搭处世态度，而搿点特色搭味道侪浸润散布辣都市市民个习惯用语当中。

　　第一种精神，就是“实打实”。

　　上海是移民城市，移民来到上海以后,多数人侪是“脚碰脚(差勿离)”,面对差勿多是相等个地位搭机会,积极谋生，辣自由竞争中培养了一种重实际、负责任个实干精神,“硬碰硬”、“实打实”、“明打明(光明正大)”、“乌龟掼石板”,“着实”勿做“虚头”。做生活“担肩胛(承担责任)”,“吃辛吃苦”，一步一个脚印个苦干；伊拉反对“滑头”、“拆烂污”、“空口说白话(信口开河)”，指斥无边际个空谈为“飞机上吊大闸蟹——悬空八只脚”。

　　第二种精神，是“门槛精、活络”。

　　竞争个商业社会磨砺陶冶了上海人个“门槛精”，行事“精打细算”，讲究能力搭技巧，“懂经（在行）、来事、有法道”。办事还养成了“活络”个门道，“头子活，路道粗，花露水浓，兜得转，就会保险勿“豁边”，“木头木脑”、“外行搭煞”是勿来三个。

　　第三种是“桥归桥、路归路”搭“契约”精神。

　　上海人奉行“各人头浪一爿天”个原则，“桥归桥，路归路（各管各、互勿相关）”，各人管好做好自家个事体，“脱侬浑身勿搭界”，反对随便“轧一脚（插一手）”；也不占人便宜，别人有什么嗜好，“关我啥事体（勿管我个事）”！“勿来勿去，大家清爽”。

　　上海人辣商业化社会里又养成了可贵个遵守规则、重理性个契约精神，崇尚“产权分明”，要合作办事，就要签张“单据”，按章办事，“关门落栓（把话说死）”。协调关系，做事体讲究“摆平”，“刀切豆腐两面光”，“谈得拢就上，谈勿拢拉倒”，勿“敲橡皮图章（决议不算数）”，勿做“一笔糊涂账”，十分鄙夷“放空炮”、“开大兴（说大话，勿能兑现）”，拨人“吃空心汤团（答应又勿得兑现）”，“放白鸽（爽约失信）”拨人“吃药（上当）”。 

　　第四种是“拼死吃河豚”个精神。

　　有了契约规则，创新就有保证。上海人十分崇尚进取开拓，觉着呒没新个“花头”就“勿适意、勿太平”。敢于冒险创新，就“勿管三七廿一”，勿惜“掼铜钿银子（花钱下本）”、“横竖横，拆家棚（横字当头，豁出去拉倒）”，去“钻天打洞”，所以上海是个“冒险家的乐园”，上海话当中崇扬创造性个成语特别多,像“碰碰额角头(碰运气)”,要“出风头”，“一蓬风”勇往直前，勿怕“顶山头(碰钉子,被顶住)”,勿怕“老虎头浪拍苍蝇(胆大包天)”,交关人有“闯市面”、“开码头(出外闯荡)”个勇气。伊拉深知“小钿勿去，大钿勿来（吃点小亏而占大便宜）”“旧个勿去，新个勿来”的道理。会做生意个上海人还常常对常例“勿领盆(勿买帐)”,企望“小鬼跌金刚(弱者战胜强者)”,“棉纱线扳倒石牌楼”。伊拉连小囡都褒扬从小“野得出(闯得开)”，“出（闯得出，善于表现自己）”，最勿屑个是“脑子勿转弯”，或者成为“软脚蟹（喻胆小、意志薄弱的人)”、“缩头乌龟(喻遇事退缩在后、无能的人)”一类个“缩货”。