气象预报讲当天晴到多云。下班辰光夹忙头里落了一场大雨。交关人迓辣地铁口等雨停，还有勿少人骂骂太平山门：“天气预报以后登到《参改消息》浪去!”“春天里向也会落出阵头雨，天晓得!”上海人个口头语里常常会讲“天晓得”。平常畅通个路段堵车了，天晓得。公司里奖金发少了，天晓得。小菜场蔬菜涨价了，天晓得。就是投五投六落脱了一把钥匙，还是天晓得。上海闲话里个天晓得勿用沪语托福来翻译，大家都明白意思，天晓得等于天知道。关于天晓得还有一只老上海个故事：将近一百年前，广西路汉口路先后开出了两爿糖食店，店名一式一样，都叫“文魁斋”。两爿店都指责对方是冒牌货，自家才是真正老牌个“文魁斋”。其中一家辣店门口挂出一块牌子，上书“天晓得”三个大字，还画了乌龟来影射对方。勿料数天之后对方也如法炮制，挂出了同样“天晓得”和画上乌龟个牌子。搿就弄得大家辨不出真伪了。搿两爿店都正对了大舞台戏馆个前门。由此老上海就流传出一句上海闲话个歇后语：“大舞台对过——天晓得！”现在《上海话大词典》里收录了“天晓得”一词，解释为“表示难以理解或无法分辨”。天晓得就变得大家晓得哉。

　　亲友之间、朋友道里，侬为某人、某事感叹天晓得个辰光，别人会因为一片真心勿能够拨侬理解、一段真情勿能拨侬明了就叹息：“天地良心、天地良心……”天地良心同样是上海人经常挂辣嘴边浪个一句闲话。当好心拨人家误读为坏心，当真情拨人家错当为假意个辰光，有口难辩、有理解勿清个辰光，上海人就会急得对天发誓了：“天晓得、真正天晓得！天地良心、真正天地良心！”凡是上海人讲到搿样一层个辰光，后面应该是呒没啥个闲话可以再讲了。

　　当然，讲天晓得、天地良心决勿是老实人个专利，上海人里个滑头货也会拿来伪装自家。明明是背后放了人家野火、戳了人家壁脚个朋友也会冤枉鬼叫个讲“天晓得、天晓得”。明明是抬高了价钿、骗顾客铜钿个生意人也会拍拍胸脯喊“天地良心，天地良心”。要能够识别出“天晓得”、“天地良心”个真伪是人生个一大难题。世界浪还呒没发明出搿样个检测仪器和实验试纸。辣我看来，时间才是试金石。老古闲话讲：“日久见人心，路遥知马力。”一点呒没错。千真万确。