网浪向有过交关学上海闲话个物事，其中有个“上海话初级考试”，有点题目个答案我觉得勿大对，现在我提出来大家一道看看对勿对。

　　有一道题是辣“王、望、黄、横”里找出读音不同个字，答案是“望”。搿个当然也呒没侪错，老底仔上海话里“望”读成“忙【mang】”，像“巴望”、“望望侬姆妈”，“望远镜”里个“望”也读成“忙”。但像“希望工程”是勿大有人去读“希忙工程”个。

　　倒是最后个“横”字，读成“王”是勿对个，“横”与“王”发音完全勿同。“王”个韵母是“盎【ang】”，“横”个韵母是“樱【an】（上海闲话读音）”。后面迭个韵母可以讲是上海闲话个特色之一。

　　有专家认为新派上海人迭两个韵母已经勿分了。我勿赞成迭种讲法。当然现在肯定有人“横道线”读成“王道线”，应该想办法去纠正伊拉，学正宗个上海话发音，而勿是认可上海话以后迭两个音就读成一样了。

　　上海话发音里有些声母后面只跟韵母“盎”，勿跟韵母“樱”个。比方声母“F”和声母“V”，与韵母“盎”一道就是“方”，“房”但勿好跟韵母“樱”。

　　也有后面只跟韵母“樱”，勿跟韵母“盎”个。比如辣“Y”后面，与“樱”一道拼就读成“央”，但呒没跟韵母“盎”个字眼，类似个还有声母“J、Q、X”后面也勿跟韵母“盎”，跟个是复韵母“央”，像“姜、腔、乡”等。假使两个韵母勿分，哪能读法子呢？

　　阿拉拿迭两个韵母个字眼摆辣一道，大家读读看，“装”与“张”，“唱”与“厂”，“商”与“省”，“上”与“长”，“党”与“打”……“迭块肉介壮”，“昨日股票乱涨来”阿是读音完全勿一样？ “到上海”读成“到长海”，“迭个人老长个”读成“老上个”啥人晓得侬辣讲点啥。

　　假使再搞勿清爽，去看上海人搓麻将，一看，三只牌一样——“碰（韵母樱）”，大家侪懂个，阿有啥人，一看，三只牌一样——“胖（韵母盎）”！旁边个麻将搭子眼睛要提白了。

　　编者注：作者一个看法是上海话里“望”有文读音白读音两种，勿好一概而论，搿个是对个。作者个另一个观点，是上海话里向老派音是正宗，应该要区分【an】【ang】两个不同个韵母。

　　继续叉下去，看见四只一样了，“杠（韵母盎）”，“喔唷，侬手气好唻。”假使侬看见四只一样，来一声“哽（韵母樱）”，旁边人要打120了送侬去医院了，一路浪还要问侬鲠的是鱼骨头还是鸡骨头，还是真的拿麻将牌“吃”下去了。