上海个淮海路，辣拉交关人心里向是时尚个象征。

　　不过，淮海路辣海我心里另外有一个景象老是抹勿脱。勿晓得还有多少人记得，老早辣拉淮海路茂名路转角，曾经有过一只“中苏友好画廊”。伊个是上世纪五十年代中期，是中苏友好大厦“苏联展览会”结束后造个，相当相当考究。我猜想当时是准备永久性展示苏联建设成就个。当然，啥人侪呒没想到，介牢靠个友谊后来会突然就倒塌了，画廊自然也就随之消失。

　　画廊就辣拉国泰大戏院对面，绕牢法国总会花园个外墙，法国总会解放后有段辰光是民主人士“聚会”个“文化俱乐部”，“文革”后日本商人辣海伊上头造了“花园饭店”，倒是老建筑保护个典范，可惜迭种案例忒少。画廊靠淮海路个一段比较短，茂名路浪长，足足有半条马路。整个画廊镶嵌辣厚实个水泥墙浪，离地一米多，高80公分，一米一个间隔，迭些尺寸侪只能讲是个大概，因为伊个辰光我刚刚够得着，想看得清爽还要踮踮脚。画廊是橱窗式个，有一米深，展品大多是立体模型，邪气精致，我十年前参加《新民晚报》一趟有关淮海路个征文，写到过迭只画廊，得了三等奖。

　　记忆当中特别清晰个模型有克里姆林宫，伊只塔尖上个红星会一闪一闪。还有莫斯科大学，典型个苏式建筑，中轴对称，高大雄伟。1980年莫斯科奥运会标志，一看就是伊。我曾经有过做梦一样个念头：长大了到伊面去读书，结果到应该上大学个辰光我正好辣拉伊远东个对岸伐木头。当然小辰光最感兴趣个是会得动个，像莫斯科地铁，列贝金斯基铁矿，巴库炼油厂，模型当中一部一部火车辣拉地下、辣拉山洞里、辣拉奇奇怪怪个设备里向穿来穿去，一歇歇从迭搭钻出来，一歇歇从伊面钻过去。还有人造卫星，火箭发射塔稀奇得一塌糊涂，看得我趟趟侪舍勿得离开，就连农庄里个“康拜因”也是伊个辰光就晓得个。尤其是夜里向，原先煞煞静个茂名路，画廊一长排五颜六色个灯光前侪是人头，交关闹猛。总之，伊对我小辰光来讲，勿光光是一排“西洋镜”，实实在在就是一个科普学堂。我只要有机会去淮海路，必定是要到伊面去看一遍，生怕会错过啥个新“花头”。我姆妈老是讲我，侬哪能百看勿厌个，可惜呒没等我“百看”伊就呒没了。

　　七十年代辣拉西藏路和平电影院对面，上海人自己也弄过一只“科技画廊”吸引过不少人，但无论如何，侪呒没办法替代少年时埋进我心底里个伊份光彩了。历史翻过去了，希望随了中俄友好以及“一路一带”，辣拉上海啥地方再弄一只，肯定会更加光彩夺目！