搭上海人来攀谈颜色，相信绝大多数个外地人都要输拨阿拉上海人个。讲起五颜六色，上海闲话里个词汇是绝对丰富多彩个。先来讲红颜色。最正宗个红是大红。为了强调红个纯正，上海人称伊为血红、血血红。“搿件衬衫血血红，侬穿了之后轧到人堆里就看得到、落勿脱哉！”淡一点个红，上海闲话叫粉红。粉红里带一点点米黄颜色个，上海闲话称米红。红得如印泥色个为朱红。红里透出橙色个是桔红，红得如熟桃个是桃红。红里带有铁锈色个是铁锈红。还有血牙红、胭脂红、玫瑰红、生姜红、紫绛红……一只红颜色辣上海人嘴巴里可以讲出交交关关个花头经出来。老上海人还会讲出外国红、西洋红，搿个是因为以进口个红颜色来染出个土布，颜色特别鲜艳亮丽个缘故。

　　要讲起绿，是漂亮个、弹眼落睛个绿，上海人称之为碧绿、碧碧绿。像清水河浜里个绿是水绿。如嫩草一般个绿是草绿。似生苹果一样个绿是苹果绿。绿中泛出黄色个是秋香绿。似湖水清澈个叫湖绿。如青葱鲜活个为葱绿。以颜色深浅为标准个有淡绿、深绿、暗绿、墨绿。要讲起黄，最跳眼个是叫作蜡黄、蜡蜡黄。各种各样个黄颜色也可以排出一长串来：金黄、桔黄、澄黄、杏黄、米黄、鹅黄、姜黄、土黄、淡黄、深黄……上海人或以花卉、或以蔬菜、或以水果来区分出各种颜色，真算是来自生活中个一种本事。海上个文人骚客是创造勿出来个。必定是买、汏、烧个阿姨妈妈们发明出来个。我以为。看看对青颜色个比拟就晓得了。豆青、似青豆色。花青，如花蕊色一般。蛋青，以蛋来比方。蟹青，呒没到小菜场去捉过大闸蟹、梭子蟹是形容勿出来个。最好看个青，上海人称之为生生青。最实用个青，是藏青了。辣老早“蓝蚂蚁”年代，男女老少大家穿藏青布装、呢装、长裙、短裤。千篇一色。就是白与黑，上海闲话里也勿少花头。白，本白。搿个是指还呒没漂白过个白个本色。雪雪白当然是最白了，如雪一般纯洁。米白、月白、灰白是勿够白个白。而煞白、煞煞白是白得要吓煞人。黑当中个大王就是墨黑了，墨墨黑。“良心墨墨黑”，上海人对心术勿正个朋友即是搿样比喻个。生动无比。

　　要讲上海人是“好色之徒”一点勿为过。不过搿搭里个色只是指颜色，搭其他个一切色无关。只要看看听听阿拉上海人来定义介许多个颜色，就应该服帖了。勿服帖勿来三个。