讲起粮油店，市区个老朋友侪晓得个；话起豆面店，乡下头个过来人侪忘记勿脱。

　　搿两种店呢，有两个共同点：第一，侪有得卖馄饨皮、面条咾啥个面制品。第二，打烊辰光侪要上排门板。勿同个地方呢，讲起来交交关【很多】。

　　粮油店开辣市区，门面辣周围居民比较多个中小马路边浪，进货用个是卡车、“黄鱼车”，弄堂里墙门里大楼里个居民顶多十来分钟就好到了。店个名字或者叫某某区第几粮油商店，或者是某某区加上所在地个路名冠垃粮油商店前头。居民拉习惯简称“粮店”。粮油店归粮食局领导，有个店牌子前头有“国营”两个大字。豆面店开垃郊区集镇个街路【小商小店一条小街】浪向，大部分靠近河浜，进料取水侪蛮方便，进货靠挑担、拖车。豆面店呒没明显个店招，当地人一般省略地名，直呼“豆面店”。豆面店属于当地公社【相当于乡镇】个商业组织供销社，是合作商店，职工一般是“集体”编制。

　　粮油店卖米是主业，大米、洋籼米，节日里向也卖糯米。店里个设备比较先进，卡车拿成包个米卸到大池里，店员开动电动售米机拿米吸到两个人高个铅皮大斗高头，再通过管道开通闸口让米落到栲栳里向过磅，份量称足准了，顾客只要张开米袋候垃出米口，米就会哗哗个泻到袋里。不过伊个辰光买米要凭粮卡，还要排队。粮油店还有面粉、糯米粉卖，面条、馄饨皮是面制品工场做了装过来个，去晏【e,迟】了就买勿着。不过卷子面日日勿断档个。赤豆、绿豆应季上市。也连带卖萝卜干、酱瓜、乳腐咾啥个咸小菜，还有得又咸又鲜的醉麸。豆油、菜油、酱油可以零拷，高粱酒、老酒瓶头跟零拷侪可以，有个店里还带卖豆瓣酱、辣货酱，逢年过节还卖花生米。垃市中心，“米店（粮店）”告【和】“酱油店（油店）”也有交关是分开个。

　　豆面店勿卖米、也勿卖面粉，伊既是豆制品面制品个小工场，又是专门卖豆、面制品个小商店。葛末小镇浪向到啥地方去买米呢？只有一个地方，市河边浪，轧米厂旁边个粮管所，而且只卖米告面粉，别个勿卖。搿个是郊区粮店跟市区粮油店明显勿同个地方。豆面店作场间比店堂深。作场间里七石水缸、磨盘、大镬灶头告轧面机咾啥分列各方，面粉、黄豆堆垃角落里向。轧面机拿面胚轧了薄一眼、手工切了小一眼，就是小馄饨皮子；换一档添槽刀，轧出来就成面条。搿个辰光，一清早就有人挎仔篮头来排队，面条、馄饨皮、小馄饨皮子最热门。豆面店个豆制品全部现做现卖，柜台就是几块简单个排门板，一直贴到靠街沿。豆腐一版一版叠垃架子浪、豆腐干丝像一圈绞花摆放垃竹匾里，还有一大竹匾个酱豆腐干、一大栲栳个油墩子【油豆腐】，一大木桶个豆腐浆。豆面店个师傅晓得当地人个口味，豆腐做得来又厚又大，勿老勿嫩，烧荠菜肉丝豆腐羹最好吃；油墩子发得油光锃亮，香扑扑、胖笃笃，烧油墩子嵌肉，就会得汁水收得足，肉圆芯子又鲜又嫩。搿个油墩子有个人还喜欢买了就抓到嘴巴里吃，杀杀馋痨虫。搿个辰光镇浪居民有粮票，买面条馄饨呒没问题。葛末农村个社员同志哪能办呢？还好生产队里也种麦，五六月份小麦一熟，预分麦子当口粮，农民就拿小麦轧成散面【面粉】,用散面到豆面店里调面食。还有一些人家就干脆自己擀面，面条馄饨皮侪做得老像腔个，吃口也韧劲蛮足、蛮滑爽。豆面店晓得农民节俭，还开展黄豆调换豆制品个业务，一斤黄豆再稍微贴眼钞票就可以调三斤豆腐，来得个受农民欢迎。

　　现在，垃小菜场边浪、小区或者弄堂口头还有得门面老小个个体粮油店，大米、面粉已经侪是小包装了；以前个粮油店有个已经转到一个集团里向去变成连锁小超市了；集体个豆面店也差勿多侪关光了。不过，侬只要到超市、大卖场里转一圈，粮油店告豆面店里个物事，还有啥个买勿着，而且还要多得多。