今年过年老天爷算是帮忙个，让上海人过了一个干净、适意个新年。干净，年前年后个一个礼拜里呒没滴滴答答个落雨。适意，初一、初二、初三气温上到了廿几度，春天赶早市轧到了春节里。老话讲，干净冬至邋遢年。已经记勿清爽旧年冬至到底是啥个天气了，反正大家已经赚到了一个干净新年。不过刚刚开始正常上班，老天爷又拨阿拉上海人颜色了。落雨、飘雪珠、飞雪花，气温跌下来十几度，大家又恢复缩头缩脑了。

　　上海算勿上是个冰天雪地个地方。雪要好几年才落一趟。雪也难得可以积起来一趟。难难板板积起来一点白雪，上海人就忙煞哉，跑到公园里、绿地里去拍雪景、拗造型。冰虽然年年会结上一点，但太阳一出来就烊脱了。气温跌进零度，上海就会大惊小怪：“勿得了，冷煞了！”上海人有点勿怕热、只怕冷。老底仔一到冷天，年纪轻个人上班，从头裹到脚，脚下要绒线袜加老棉鞋。阿姨妈妈从早到夜抱只热水袋。后来改良了，就捧一只冲了开水的盐水瓶。上年纪个老爷老太睏觉要弄只烫婆子塞到被头洞里。伊个辰光大家都呒没冷暖空调，实在冻得吃勿消，就拎了烧煤饼个炉子放到房间里来取取暖。告咾一到冷天常常有大人、小人煤气中毒个事故，怕冷怕冻弄出人性命。作孽。

　　外地朋友、尤其是东北人冬天到上海来，一看气温只是零度左右，就会笑上海人耐勿牢寒冷。不过伊拉笑得早了一点。只要伊拉辣上海长住下来，会比上海人还吃勿消冷天里个阴势。我辣复旦读大学个辰光，教室里、宿舍里唉声叹气、大呼小叫喊天气冷个同学多半是从黄河北面、山海关外面个猛男猛女。北方农村家家烧了热炕头，北方城市户户有供热水汀。室外是零下几十度，室内是零上廿多度，房间里温暖似春。到了阿拉上海，对勿起，室外室内一个样。朝北个房间有辰光要比朝南个室外还要冻人，难怪北方同学到了毕业分配多半就逃回到老家去了：“上海个热天和冷天都挺勿过去，撤退！”

　　阿拉个同学眼光短了一点。现在上海人家家户户有了空调。热天勿吓，冷天勿怕。只要与铜钿银子过得去，日里向、夜里向侪开足了空调来过小日脚。就是到外面跑跑，公交有空调车，地铁里热烔烔，写字间里暖洋洋。百货公司、大卖场里就更加勿用讲了，柜台里个小姐们都穿了春装来做生意。上海基本上消灭了手上、脚上、耳朵上个冻疮。上海越来越暖热了。赞！