近来搿几年，啥个体育运动最火，勿是乒乓勿是足球勿是网球勿是桥牌，而是拳击（boxing）,老早上海人叫做“搏克星”。已经五十多年个事体了，当年我勒辣卢湾区卢湾中学读书，学堂里体育运动邪气出色，无论足球篮球排球，其中还有拳击。学校很多班级男生都会打拳击，阿拉班里就有几个拳击“高手”，其他同学也都能打，我有辰光也“跃跃欲试”，课余辰光、课间辰光，来一两下子，有时确实打得头昏脑涨、眼冒金星。班里一位殷姓同学，因为鼻头勿好，人称“沙鼻头”，常常被打得鼻血横流，血出污拉，但仍“轻伤勿下火线”。

　　原因之一是学校体育教师有两名就是拳击运动员，一位姓张，一位姓陶，除了规定个体育教程外，拳击也是兴趣项目，搿个自然就是“有其师必有其徒了”。还有一个原因是，埃个辰光阿拉学校有得交关印尼华侨学生，男学生大多会打拳击，课后常常看到伊拉捉对“厮杀”，于是拳击勒辣学校悄悄兴起了。伊个辰光社会浪向拳击也是体育项目之一，经常会举行比赛，老早仔认得一位年纪比我大，叫杨家森个朋友，就是当年青年轻量级冠军。伊出身名门，住勒西区茂名路花园洋房（可见搞体育勿一定侪是穷人家个小囝，或者是四肢发达头脑简单个莽汉，当年上海足球队里有很多人是医生教授工程师），几十年勿看见了，杨兄勿知身体阿好。

　　讲起打拳击，有一桩趣事。上世纪六十年代伊始，特别是“十年动乱”期间，拳击被认为伤害性运动而勒令禁止（据国内外科学家、运动学专家研究，拳击勒各项体育项目中，伤害率是比较小个）。大家勿打拳击了，也呒没赛事，拳击一下子销声匿迹。有一趟（搿已是“文革”中后期了），上海体院一位朋友领我到体院白相，勒辣风雨操场里，看见两个男生勒打拳击，我一时技痒，也想过过瘾。朋友劝我勿可造次，当心吃生活。我讲打打白相相。伊个学生汉子见我戴副眼镜，一派文弱个样子，勿拿我放勒心浪。我是练过个，刺拳，巴击、假动作，伊一勿留神拨我横拳击中鼻梁，顿时鼻头流血了。此时伊“七窍内生烟”，朝我猛扑过来追杀，我只得且战且退，最后缴械俯首称臣。搿位拳手咕哝了一句：“想勿到侬也会打拳击。”

　　“文革”后，拳击恢复，经常勒电视里播放，迭个辰光我已勒辣新闻单位工作，搭同事经常看国外拳击赛转播，啥个阿里啊迈克·泰森啊，啥个霍里菲尔德、里迪克·鲍、刘易斯，现在乌克兰个克里琴科等，我是背得滚瓜烂熟。搿歇赋闲孵勒屋里向，除了看书听乐涂鸦练字，搭同学打打桥牌外，星期天中午还看中央台转播个拳击比赛，几乎雷打不动。

　　老早由于营养条件差和其他因素，拳击项目发展迟缓以至停顿，而今改革开放，日脚好过，经济条件各方面大为改善，中国拳击运动登上国际体坛为期勿远了，拳手邹市明、熊朝忠、张君龙等等勿是已经勒国际拳击争霸赛上亮相了吗？