歇后语，是五十年前我到东北以后才头一次听讲。平常讲东北方言丰富，其实是歇后语占据了交关份额。像“屎壳郎戴花——臭美”，“大姑娘上轿——头一遭”等侪邪气通俗，有一句还蛮有哲理：“皮裤套棉裤——必有缘故，不是棉裤薄，就是皮裤呒没毛。”近年来以辽宁方言为基础个小品介受欢迎，跟东北语言丰富直接有关。葛末上海闲话里是否有歇后语呢？当然也有。我收集了一点，算是抛砖引玉了。 

　　行灶里推出木柴——千年难得；阿王炒年糕——吃力勿讨好；湿手搭面粉——想甩甩勿脱；热豆腐烫煞养媳妇——急煞勿煞；床头底下放鹞子——大告勿妙；扫帚柄上出冬笋——异想天开；顶仔石臼唱戏——吃力勿讨好；泥菩萨过河——自身难保；肉骨头敲鼓——老是浑咚咚；吃素碰着月大——运道推扳；瘌痢头上插金花——死要好看；象牙筷上扳掐丝——硬捉扳头；朝天鼻头插筷子——像煞有介事；老虫勿留隔夜食——急吼吼；万宝全书缺只角——大失所望；额角头碰着天花板 ——运道太好；急煞鬼碰着慢郎中——白板对煞；剃头挑子 ——一头热；雀见砻糠——空欢喜；麻皮搨粉——白费劲；活狲屁股——坐勿停；瘌痢头儿子——自家好；脱裤子放屁——多此一举；混汤摸螺蛳——趁机捞外快；捏鼻头做梦——胡思乱想；嘴硬骨头酥——外强中干；螺蛳壳里做道场——小地方办大事体；马屁拍辣马脚浪——白辛苦。

　　歇后语勿管是东北还是上海，过去侪来自旧时代个“草根”，有时“糟粕”难免。勒拉上海“歇后语”里对“麻皮”个嘲讽比较多，迭个跟老底仔呒没接种“牛痘”有关，使“天花”个后遗症相当普遍。 如：雨落灰斗里，鸡啄西瓜皮，脚炉盖当镜子等，“谜底”侪是“一脸大麻皮”。人家因“天花”而落下“麻皮”已勿幸，用迭些比喻去嘲讽，实在是勿作兴、勿应该个。