小辰光喜欢猜谜语，搿辰光叫猜谜谜子。记得有一则字谜：两个王先生，出头又出脚，走到山浪向，吃碗豆腐浆。谜面要拿上海闲话读，能押韵，而且“出脚”搭仔“赤脚”是谐音，听起来老流畅。谜底是“豐”字。现在简化写成“丰”，只有“一个王先生，出头又出脚”了。按现代灯谜个规范，搿算勿上规范个灯谜，只能算谜语。

　　辣一次谜人聚会时，谜界前辈申老（立峰）讲述了一则老灯谜，面是“难产”，打上海闲话四字用语。当时挂了两天，呒没人猜出来。第三天有一个人猜出来，谜底是“死勿临盆”。大家侪拍手称绝。难产是妇产科常见疾病，大多是胎位勿正。临盆是临产、分娩个意思。死勿临盆就是小囡生勿出来，迭个是老危险个。老早点医学勿发达，有句顺口溜：生小人是“有命吃鸡汤，无命见阎王”。辣搿则灯谜个谜底，上海闲话“临盆”是服帖、买账、认错个意思，死勿临盆就是犟头倔脑，随便哪能勿肯买账，搭生小囡勿搭界。

　　谜界高手江更生先生有一则精彩个上海闲话灯谜：“金猴奋起千钧棒”，打上海闲话三字用语，“精打光”。谜面是毛泽东七律《和郭沫若同志》中成句，下联是“玉宇澄清万里埃”。谜底紧扣谜面，意思是“把妖精都打光”。而上海闲话里“精打光”意思是“一点都不剩”，搭妖精一点勿搭界。

　　灯谜是一项文字艺术，讲究别解，别解与正解差距越远，趣味就越浓。以上两谜称得上佳谜。

　　受到前辈、高手个启发，前段时间我也学做了几则上海闲话灯谜。1.为夫君理发，打上海闲话三字称谓，光郎头。谜底扣谜面时，“光”作为动词用。光郎头即光头，延伸为男小孩。例：伊拉屋里向两个光郎头，讨老婆开销勿得了。2.摆噱头，打一字，扣。上海闲话“摆噱头”是设圈套让人上当，或者滑稽戏、独脚戏里抖笑料。放辣搿搭块，真个是摆摆噱头，侬要是从迭个意思去猜，就拨伊噱头摆进了。辣迭则谜语里一眼呒没迭层意思，伊只是字谜中离合法，“头”作为方位词，表示取“摆”和“噱”两个字的头一个部件，“扌”和“口”，组合成“扣”字。第一则谜底是上海闲话，迭则谜面用上海闲话。再有一则谜面、谜底侪是上海闲话。3.索子一两挺张呒没和，打一上海闲话三字用语，勿来三。搓麻将，手里捏仔一索两索，挺张等和，就是呒没和，因为“勿来三”。但是上海闲话个“勿来三”搭搓麻将浑身勿搭界，是“不行的”意思。