答：北方话上述“的”、“地”的虚词用法是从古汉语指示词“底”虚化而来个，吴语当中的上述用法其虚化的途径是另外一条，是从古汉语指示词（再早用作量词）“个”虚化而来的，语言学家有关专门个论述个论文老长个，搿搭勿便转述。但搿个是语言学界的共识，现在中外语言学学者在最权威《方言》杂志浪向研究吴语侪用“个”字。搿搭再举两个文献浪个例句： “湿时节好像海蜇个风味，干时节像荷叶个蓝班。”（明末冯梦龙《山歌》）“侬等一等，我去叫落脱票子个人来，大家当面白话。”（1908土山湾法国传教士《土话指南》）“搿个人”、“我个书”中个“个”读音一致，上海老派侪读“ghek”，也有进一步虚化，声母失落读为“hhek”个。

　　“格”字个上海话读音为“gak”，一不是浊音声母，二韵母也不同。如作为同音字替代用法，“格”只能代写读清声母的老苏州话（但现苏州方言词典中也写“个”），却勿能代上海话。有个人可能看惯了苏州话文献，就用伊代上海话了。由于有些年轻人习惯用普通话输入法去打上海话，结果造成了普通话音和上海话音相混，用普通话读音的“额e”或“呃e”来代写读浊音入声音的“个hhek”，“额”辣上海话里读“ngak”,“呃”上海音读“ngek”，跟“个”并勿同音，即使是有时必要用同音代替，也必须用本方言个同音字，勿能用另一个音系个读音来注上海话字个音。何况汉字是表义文字，勿是表音文字。所以“额”、“呃”的写法是错误个。