陈寅恪先生讲过：“中国的文化保存在语言中。”方言写起来，中国文化越加丰富，越加多样，多元博采，又上一层楼。葛咾上海话可以写，勿是啥人家下指示，勿是啥地方下指标。

　　夜报介许多上海话文章，是老百姓自家欢喜看自家欢喜写出来个，因得“社会的发展总的趋势是越来越走向语言和文化的多元化和平民化，而不是走向单元化和精英化”。①

　　看啥侪要看四处八路.文学浪个普通话赛过越多越是高，方言赛过越少越是好，顶好是呒没。拿方言看轻看辣脚底下，赛过普通话大黄鱼，方言橡皮鱼，葛咾“方言保护”刚刚起只头，赛过橡皮鱼卖大黄鱼价钿，热门了吓一跳，吓出来“方言神话”哉。中国方言文学勿是中国文学？伲老里八早“书同文”，方言写个也是汉字，只是普通话有个字勿用了，方言还辣用。碰着方言独有个特色词，有种注释清爽就好。方言里冷僻字勿见得比古文多，又加上勿是外国面孔只只陌生，伲好照牢注释读古文，读外文，啥体勿好照牢注释读方言？多读读，注释也好厾开。上海话写个，吴语区大一半看得懂，别个地方看勿懂，也好写自家个方言。覅忘记伲一个省人口常庄顶人家几个国家，勿是一小撮人，好好叫比硬劲辣脑子里翻译一遍写仔普通话来得活剥鲜跳、活龙活现，因得勿关啥地方，母语差勿多侪是方言，啥闲话比母语亲？

　　方言呒问题。问题倒是正音正字。勿写正字，照普通话个发音烂写一泡，“味道”写“米道”，“瞎好吃”写“哈好切”，汉字变表音文字了。迭个是语言障碍，读起来赛过读天书。好得有仔《上海话大词典》，只只字侪有标准写法，问题解决哉。哪能原旧七支八搭，“邪气”想着歪风邪气？葛末“很”就是“险恶、凶暴”，“蛮”就是“野蛮”，“非常”就是“不正常”，“打朋”是请朋友吃生活哉。“邪气”写啥“霞气”，“霞”是用普通话个音读上海话，上海话“霞”发音[yha]，真正上海人哪能勿晓得霞飞路？“邪气”里“邪”发音邪[xhia]，一眼也勿搭界，真叫硬装斧头柄。“窝”，上海话咾吴语咾，里头只有“窠[ku]”，呒没“窝”。啥体呒没？伲老祖宗个文化，伲老祖宗个历史。

　　汉字勿是“一向灵活”，吴语文学有三百多年历史。上海话有局限？有个。普通话也有局限，侬美国去人家也听勿懂。有人出闲话，讲讲又听勿懂，写写又看勿懂，意义有？有个。伲要地方戏剧啥意义，啥体勿统统改成功歌剧？伲要博物馆、美术馆派啥用场，啥体勿统统改成功快餐店？回答邪气简单，伲上海人，上海话是母语，母语是伲根本。人家听勿懂伲母语，乃勿成伲母语覅哉？ 

　　注：①《上海俗语》，钱乃荣引中国社会科学研究院语言研究所长沈家煊论文的话，上海文化出版社，2009-5-1