上海人相亲谈恋爱叫“轧朋友”。辣拉“文革”个辰光，受到社会浪一眼切口个影响，“轧朋友”又变成功“谈敲定”，意思大概是谈法谈法就敲定了。搿辰光，一到夜到，外滩黄浦江边浪只看见一对对轧朋友个男男女女，从黄浦公园一路排过去一直到延安路，防汛墙边浪侪排满了，稍晏一眼去，就呒没位置了，真叫做人轧人，“轧朋友”名符其实。搿辰光上海人屋里向房子侪老小，呒没条件拨侬独立个空间，而咖啡馆又消费勿起，乃末只好到外滩搿块露天场地，又勿要花钞票，又勿受辰光限制，葛咾人轧足输赢。迭样子就形成了上海滩浪最有名个“情人墙”。

　　到了上世纪70年代，知识青年上山下乡，阿拉搿帮“插兄”虽然到了轧朋友个年龄，但因为受到经济条件个限制，男女之间就是有眼意思，大家侪是瞎子吃馄饨——心里有数。到了后期，看看实在熬勿牢了，有眼胆子大一眼个朋友就开始挑明关系，轧起了朋友。但是农村呒没上海“情人墙”搿种浪漫个地方，再加上外头蚊子多得来臭要死，蹲拉田边约会赛过辣喂蚊子。一个夜到下来，浑身上下侪是“蚊子块”，哪能吃得消。勿晓得阿里一个朋友想出来个办法，就是迓辣蚊帐里约会。乃末一到夜里向，宿舍里三只床蚊帐一关，就是两人世界，大家轻声细语，各自为政，互不干扰。

　　转眼到了90年代，轧朋友突然变成功电视台个一档节目，男女之间私底下个承诺变成“爱情宣言”，轧朋友约会个场景可以辣拉全社会实况转播，搿就让阿拉搿种传统文化熏出来个“老古董”有眼看勿懂。不过辰光一长，看法看法倒也看惯了。有辰光看得也蛮扎劲。只是现在轧朋友，双方个要求比较高，从卖相到经济条件，侪有一定个标准，要双方大家侪轧得拢，难度蛮高个。常常是男方看中女方，女方却呒没一点感觉，而女方看中男方，男方却老早拿伊派司脱了。能够双方互相碰得拢顺利牵手个好像屈指可数。有辰光几十期节目做下来，辣拉台浪向个男嘉宾（或女嘉宾）还是搿眼原班人马，伊拉成了相亲节目个“钉子户”。

　　想当初，轧朋友个辰光，马路荡荡，小吃摊浪吃碗小馄饨就可以打发一趟约会。有辰光送女朋友回去，因为有讲勿光个闲话，一路荡过去，勿知勿觉已经到屋里向，连车钿也省脱了。而现在个小青年轧朋友，一趟约会呒没两三百块过不了门。稍微手头松一眼，几百上千侪是毛毛雨。葛咾现在轧朋友个成本邪气高，万一勿成功，就落得人财两空，弄得来有眼小青年一想到轧朋友就头大。不过讲是迭能介讲，大多数小青年总归还是要轧朋友个，而爷娘辣拉经济浪总归是子女个弹硬靠山。

　　轧朋友到底看人品嘭嘭响，还是看钞票木咾咾，或者是看卖相刮刮挺？老底仔轧朋友，最早只要看人老实巴交就来赛，后来讲究“根正苗红”，再后来欢喜“革命军人”“海外华侨”“成功商人”，随着形势个发展，眼界越来越高，发展到今朝，要求“高富帅”“白净美”。其实，现在要寻到迭能介个对象实在有难度，怪勿得现在剩男剩女介许多。讲句老实闲话，轧朋友最重要个还是要看人品，还有感情是第一位个。假使钞票木咾咾，感情冷冰冰，搿能介个日脚还有啥个意思呢。