小辰光，老娘每天辣拉我背起书包上学堂辰光，总要叮嘱关照：“走路覅望‘野眼’，当心撞到电线木头；上课覅望‘野眼’，专心听老师讲课！”下课回到屋里向，碰到算术难题，一边咬着铅笔头，一边歪头看窗外，盼望有成绩好个同学路过，好问一声：“迭道题目哪能做？”老娘看见了，又掼过来一句闲话：“覅望‘野眼’，自己动脑筋！”

　　工作后，工段长老潘看我路远勿便照顾发拨我张“自行车票”，我用省吃俭用储蓄个149元买了部28英寸凤凰牌脚踏车。勿料，新造茅坑三日香还呒没过，前轮胎就踏进了碎脱半只盖头个阴沟洞里，人到呒啥啥，车子三角架却弓起来了。推到工段，老师傅教训我：介宽个马路就侬闯祸，肯定望“野眼”看见好看个小姑娘了是？

　　成家了，礼拜天陪老婆到淮海路买物事，中浪到“天津馆”吃水饺。埋单辰光，我稍微搭里向个营业员讲了句“味道老好个！”慢了一步走出门，老婆回过头嘲我：“怪勿得吃水饺辰光一直辣望‘野眼’，心勿在焉，看到熟人啦？”酸溜溜个，我只当伊有口无心！

　　当然，以上望“野眼”侪勿太要紧，关键是现在车快人多个马路浪，骑电动车个人勿好望“野眼”，一定要看前头；把汽车方向盘个更覅一边开车一边刷手机视频望“野眼”，葛是推板勿起，要闯穷祸出人性命个！