看报纸、看电视、听广播、上网络，是大家个新闻来源。由此，秀才勿出门，通吃天下大事小事。新闻一是有五个要素：何时、何地、何人、何事、为何。辣英文里搿几个词恰好都是以W带头个。五个W。用上海闲话来讲五只W，都有一个“啥”字。是啥辰光、啥场化、啥个人、啥个事体、为啥事体。任何新闻里五要素缺一勿可。学新闻个辣大学操练四年，就是来操练五个W。五只“特勃瘤”，上海人把W讲成搿样子，算是蛮生动个。我是学中文个，到报社做记者是立马就上。五只“特勃瘤”有一趟就落脱几只了。结果被老前辈教训，敲了一通“瘤”。后来是长记性了。跑新闻、写新闻、做新闻，少一只W就勿来三。啥辰光，是什么时间、什么时候。上海人勿会讲出时间、时候个。时间、时候拗口。上海人问时、约时、定时就讲啥个辰光、几时、几点钟。“辰光勿早，快点走！”“吃饭辰光到哉，大家歇一歇！”“几时碰头？”“下半天四点钟，老地方！”啥场化，什么地方。普通话说得简单点是“哪儿？”“哪里？”啥场化可以讲是上年纪个上海闲话了。现在年轻个上海人就直言“啥个地方”了。要问伊拉“啥场化？”起码有一半以上个小上海人听勿懂个。语言也会衰老个。能够长命百岁个闲话一定要与时共进个。啥个人，什么人。啥人，谁？“啥个人一直辣浪里浪声？烦煞了！”“门外头啥人敲门？来哉！”啥个事体，什么事情。怎样的一件事儿。上海人早先个几年是欢喜看闹猛个。马路浪围起一堆人，路过走过个上海人就会轧进去：“喂，啥个事体？啥个整体？”老起劲个。现在上海人进步了。管闲事个少了。“有事体寻人民警察！”大家懂了。为啥体，为什么。也有讲为啥、为点啥个。上海个小小囡学会讲闲话了，为啥可以讲搿是伊拉个口头语。“为啥？为啥？”人长大了，就改口为“啥体？啥体？”了。啥体有辰光是引发摩擦个火药信子。比如，人头多、地方挤个当口，人碰到人、人轧到人了，火气大个一位就会提高嗓门：“啥体！啥体！”假使另一位有回应：“啥体？侬看啥体！”搿个是吵相骂个前奏。讲“啥体”搿句闲话，慎用警叹号。以用问号才得体、才平安。

　　考量新闻个真伪，可以究其五个W五个啥个真假。搿个也是免去听信谣传、传播谣言个试金石。经勿住推敲个往往是辣呒没啥事体中造出、编出事体来个。呵呵，勿要上当。