大名鼎鼎个“新天地”边浪向，横卧拉一个“太平桥公园”，园内一泓湖水，四面敞开，虽称勿上十分美观，但对繁华喧嚣个上海中心城区来讲，能看到介开阔个湖景，并且还好垃拉搿搭漫步，也够让人心静神怡了。

　　太平桥公园个名称，来自于当地近百年来称为“太平桥”之故。历史浪搿搭处于上海县城西门外，搭江南各地农村一样，最初也是浜河纵横，村舍簇立。一条名叫“打铁浜”个河流蜿蜒于此，浜浪有木桥“太平桥”，是当地个交通要道。上海开埠后，搿一带纳入“法租界”范围，城市化逐步加快。进入二十世纪，城内外侪开始大规模填河筑路。打铁浜也就填没建成了后来个“顺昌路”（先前曾称为“桂林山路”、“白尔路”）等，太平桥木桥自然也就随河浜拆脱了。不过此地毕竟地近老城厢，是长期形成个一个交通枢纽，乃末自然个崛起成为法租界个一大居民区搭商业中心。因太平桥木桥垃拉此地长期来是一个大家侪晓得个地标，搿一地域也就拨拉大家叫作“太平桥”了。垃拉上海，像迭能介个以桥而名个区片实际浪蛮多个，像“八仙桥”、“打浦桥”、“南阳桥”、“枫林桥”咾啥侪属搿种情况。

　　其实“太平桥”颇有自己个地域特色。一是人口大量聚集，一批石库门里弄垃拉周围应运而生，搿些里弄多以吉庆仁爱之词命名，如有“积善里”、“受福里”、“永安里”、“承庆里”等；二是烟杂、百货、服装鞋帽、南货、酱园、五金、中药、典当咾啥商铺鳞次栉比，可以讲百业咸集，购物极为便利；三是自西门路（自忠路）朝北个顺昌路两侧人行道浪，食摊紧联，形成两行颇为热闹个小食街，摊中以油豆腐细粉汤、大肠肺头汤、鸡粥、牛肉面、小馄饨、白切羊肉、白切猪头肉等最有风味，“太平桥”小吃之闻名，据说连十六铺、曹家渡等远地个饕餮客侪会专程赶来逛食；四是在西门路（自忠路）南个西侧，1917年，法租界垃拉此首辟了嵌入式室内菜市场，整天供应各色各样个家禽、蔬菜，每日搿搭人声鼎沸，当时所在马路也就因此而以“菜市路”拉上海著称；五是在西门路北个西侧，1935年“月光大戏院”破土而出，两年后，改名为“亚蒙大戏院”，专映电影。1949年后改建舞台，先后改名为“大同戏院”、“大庆剧场”，以演戏曲为主，当时由六龄童、七龄童主演个绍剧《孙悟空三打白骨精》就是垃拉搿搭演出而轰动上海个。

　　从抗战胜利以后，其兴盛繁荣热闹之状，一直延续到了本世纪初。直至“新天地”大规模开发，乃末大刀阔斧个一一抹去。于今想要追寻“太平桥”往昔个市井风貌，只有借助有关个旧照旧像了。好在“太平桥”之名，依托于迭个“太平桥公园”，依然留存于上海，并让人垃拉怀旧当中生出种种历史遐想。