上海是移民城市，以往来上海个外地人老快就可以学会讲沪语，小人就更加快了，辣辣小学里，勿会得超过两个号头个。但现在个新上海人蹲了好几年还是讲勿来。更加可悲个是：连得上海小囡也勿会讲了。国家提倡个是和谐社会，推广普通话也勿是要去消灭方言个。啥葛道理侪勿会讲了呢？

　　关键是学堂教育！

　　辣进幼儿园之前，勿少小人是会得讲个，但一进幼儿园就开始逼牢伊拉只好讲普通话了。要晓得，学语言最关键个辰光是十二岁以下，过脱就学勿大好了。小囡4周岁读幼儿园，到小学毕业，刚好就是辣辣搿个阶段。从幼儿园开始就拿讲上海闲话个路全部堵塞脱，有眼学堂甚至勿许小人辣学堂里讲一句上海闲话。假使讲了，五好班级要敲脱，三好学生就做勿着！辣搿能介个大环境里，思维也就全部转向普通话。

　　前一枪向明中学校庆，回到母校，想起一段往事。上世纪七十年代上海就推广普通话了，我个语文老师普通话邪气标准，阿拉是崇拜得勿得了。必过伊讲普通闲话个辰光是老严肃个，同学侪老吓伊个，但一到下课伊就会得到阿拉身边来拉家常，辣迭个辰光伊用个就是邪气亲切、邪气糯、邪气嗲个上海闲话了。师生间距离一记头就拉近了……

　　推广普通话搭讲方言是勿矛盾个。我是国家级普通话测试员，我个祖辈侪是本地人，我家乡语言讲得邪气道地；伊一滴滴也没影响我书面语言个表达。

　　前两日天看杂志，有篇文章讲作者辣欧洲借小汽车自由行。借车行讲导航仪汉语系统有三种选择：普通话、粤语、沪语。作者认为，勿勿少少上海人辣世界各地，连得老外也晓得要尊重上海人，特为量身定做了导航系统，葛为啥就勿能创造点环境让上海小人讲眼自家个本土语言呢？

　　学堂校长是否可以让学生辣课间休息个辰光用上海闲话来交流，拿辣辣屋里学着个上海话带进幼儿园，搭老师一道讲，勿要让伊一进学堂就拿刚学得一点点个母语掼脱了。假使老师侪能够下课用上海闲话搭学生仔随意聊聊就好了。只要做到搿一点，我相信，上海小人还是应该会得讲家乡方言，方言文化还是可以得到传承个。