记得小辰光阿拉唱个一首儿歌：“鬼【ju】鬼【ju】树林出【ca】，糕糰子拨侬吃【qa】。”讲个是一个辣海浦东乡下头个道士勿入调，装神弄鬼骗脱村民交关铜钿，临走肩胛浪向还掮拉满满一洋米袋农民自家装个糕、包的糰子咾啥，拿回去拨拉伊家主婆吃。

　　乃末宅浪向一杆（一个）青年农民气勿过，伊寻来一根干粽叶，偷偷交系垃拉道士个朝天发髻浪向。道士走垃拉土路浪向还勿觉着啥，伊一跨进树林子，四周围静得臭要死，搿个辰光，只听得背脊骨浪向“窸窸窣窣……”响得来汗毛凛凛个，道士回过头去一看末，啥物事也呒没，乃末道士一想，勿好哉，碰着仔鬼【ju】哉。伊勿敢停下脚步呀，只好一面走，一面拿洋米袋袋里个糕糰子往地壤【niang】里厾【duo】，一面厾【duo】一面垃拉嘴巴里哼唱：“鬼【ju】鬼(ju)树林出【ca】，糕糰子拨侬吃【qa】。”

　　道士后面约五十步远的地方，青年农民跟辣海，慢腾腾，笃悠悠，一面走一面往地浪向拾起拨拉道士厾【duo】脱个糕糰子。等到道士失魂落魄个回到屋里向，家主婆问伊：“糕糰子呢？”道士讲：“喔哟，覅去话伊，碰着仔鬼【ju】跟辣伲，伲拿糕糰子一塌刮子统统拨拉鬼【ju】吃得去哉。”家主婆照牢道士横看竖看，辣陌生头从伊头顶心浪扯下来一根粽叶，乃末道士耗得【晓得】上当哉，豪燥跌煞冲死【xi】回过头去寻糕糰子么，阿里搭还有得踪影？

　　伲浦东乡下头装个糕、做个糯米糰子就是介好吃。小辰光看伲奶奶【nana】装糕，真个是馋唾水嗒嗒滴：拿四成糯米、六成梗米呛【掺合】垃拉一道，干磨成粉，呛一半水垃拉一只蔑筲箕里跟红糖、赤豆拌垃拉一道，再倒垃拉一只上大下小，辣海距离底部三分之一个地方有一个镂空夹层的木屉蒸笼里向，粉一层层铺垃拉里向，蒸熟一层，啄（戳）满洞洞眼，再铺上一层生的粉，一共铺五趟。等整个一屉糕一道蒸熟仔，将木屉蒸笼顶倒，放垃拉砧凳板浪向切，切得屑屑薄还是邪气完整个一块糕，咬一口，糯嗒嗒，松扑扑，好吃来邪个。搿恁介好吃个糕现在看弗见咾。

　　做汤糰，伲浦东人用热个大米粥跟干个糯米粉捏垃一道和面，做成功个汤糰子，既糯软又勿得（黏）牙齿，搿个好吃头势啊！勿像有辰光从外面买得来个糕糰子，绷绷硬、粘搭搭。搿排里个蜜糕，吃拉嘴巴里，要末又硬又咬勿断，要末搭拉牙齿浪向牙齿也要搭脱哉。黏得怪头势啊！前半截头糕吞垃拉食道里哉，后半截头糕还垃拉嘴巴里，老人千万吃勿得。松糕末切得厚蒸勿熟，咬勿动，连下拉吃（下在沸水里）也勿来事；切小一眼，噼啪碎脱，弄得砧凳板、料理台一天世界，要收捉（收拾）半日天拉。

　　生活当中做糕糰子个李鬼搭仔骗人吃喝个道士一票货。伲要拿眼睛擦得雪雪亮，一旦发现就捉牢伊。