伊高寿九十三，我虚度六十三；伊叫我“来兄”，我尊伊“高老”；伊叫得一点勿做作，我听了也唔没啥勿舒服。

　　迪位心胸开阔、气度豁达的“老顽童”，就是被称为“九零后”的著名的书法、篆刻大家高式熊。

　　去年国庆，医院给高老发出了前列腺复查通知，结果发现指标大大高于正常标准值。一个朋友为伊介绍了一位泌尿科的专家。

　　“迪个专家姓戴，也是性情中人，70多岁的人，开口也是‘大下饭’（宁波方言），”高老毫无顾忌地讲，“伊（戴教授）讲，侬问题总归有的，阎罗王吓（怕）？我搭伊讲，我活到90多岁，勿是小鬼（念ju），已经是老鬼（念ju）了，我吓啥！”既然勿吓，戴教授搭高老讲：我要用伽马刀进行手术，一刀一刀帮侬解决，然后用中药调理。请高老勿要紧张。“我搭医生讲，反正我已经交拨侬了，样样听侬个，侬斩好了。”

　　医生唔没一句安慰的闲话，高老心里唔没一点寒意，结果先后“斩”了13刀，住院一个月。平常与高老比较熟悉的朋友侪为伊捏一把汗，高老豁达得很，“死我勿吓，只要死得爽快点。生了毛病吓唔没用场，自己要有分寸，勿要乱；假使自己一乱，就麻烦了。”

　　刘云耕同志也十分关心高老的情况，先后几次来电询问，高老讲，“人家交关人是拨‘癌’吓煞的，‘癌’是拨我吓煞的。”刘云耕同志听了十分欣慰，再三讲，高老是上海的一块宝，我们要拿伊保护好！

　　正当大家为伊担心的辰光，高老却出人意料地上黄山了。伊回来搭我讲，虽然有索道车，但是伊自己足足跑了一个多钟头，仍旧精神抖擞。

　　叫人称奇的还有，93岁的老人，眼勿花、耳勿聋、手勿抖、身勿晃，提笔写字、捉刀刻章，身手利落，力透纸背。伊搭我讲，当初辣拉“下放劳动”的辰光，伊被安排辣拉翻砂车间当小工，每天要敲多达3吨的生铁。因此直到今朝，伊捉刀刻章的辰光，劲道十足。

　　高老不仅书法、篆刻造诣精深，还是著名的印泥制作大师。60多年前，伊跟张鲁庵先生学习研制“鲁庵印泥”。1962年，张鲁庵先生逝世之前，将秘方郑重地交到了高老的手上，盼望伊拿格张秘方发扬光大。因为当时的形势，高老只能将格张秘方囥（藏）到现在。格个其间，先后有日本、我国台湾的商人闻风而来，联系高老，要想收购“鲁庵印泥”的秘方，侪拨高老谢绝了。后来辣拉静安区有关部门杨继光、陈标等人的奔走呼号下头，“鲁庵印泥”终于先后被上海市政府批准为“上海市非物质文化遗产”，和“国家非物质文化遗产”。高老表示要拿“鲁庵印泥49号秘方”无偿捐献给国家。讲到捐献，伊唔没“独吞”，专门拉了张鲁庵先生的儿子一道作为捐献人。上海人讲起来，“生活做得老上路的”，时髦点讲，叫高风亮节，豁达大方。

　　高老的闲话老简单，“格张方子是张鲁庵先生传拨我的，是伊的人情，因为长时期侪是我跟伊（张鲁庵先生）一道做个。现在国家重视了，我出来捐献，但是人家张家还有儿子健在，血脉未断，应该叫人家一道作为捐献人。钞票人人要赚，但要赚了‘路’浪；非分的钞票勿要赚。”