搿段辰光有一部中篇评弹《林徽因》走红了，开始勒辣兰心大戏院开唱，现在移演雅庐书场，听说场场客满，一票难求（笔者还未去聆赏），着实令人欣慰。

　　讲起雅庐书场倒有点来历。雅庐原来勒辣八仙桥柳林路浪，小了一眼眼，后来上世纪五十年末六十年代初搬到顺昌路一家戏院，仍旧叫雅庐书场，规模大了勿少。当年个书场邪气多，除脱雅庐，有马当路个大华书场，南京路个仙乐书场、静园书场，西藏路个西藏书场，老西门个西园书场，还有沧州书场、福州书场、红星书场、玉茗楼书场等等，真所谓星罗棋布。每有一部好书开演，老听客便会趋之若鹜，也呈一时之盛。

　　雅庐书场勒辣六十年代中期，照目前讲起来确实爆棚了一段辰光，迭个是评话名家吴君玉先生说个长篇评话（也称大书）《桥隆飙》——讲个是抗战时期，革命军队以民族大义收编土匪部队个故事——可以讲盛况空前，场场客满，买票队伍排到隔壁弄堂转弯，真正个一票难求，沪上老听客侪纷至沓来（笔者自然置身其间），雅庐书场着实风光了一番。搿个当然得益于吴君玉个出色演艺，拿桥隆飙迭个角色表演得栩栩如生，加上噱头迭出，从开书一直到散场，笑声勿断，场子里气氛活跃得勿得了，堪与苏州巧嘴、评话大家金声伯互为颉颃。

　　令人惋惜个是，好景勿长，经过十年“文革”，沪上书场凋敝，关个关停个停，存下来呒没几爿，而且也面目全非、惨勿忍睹，雅庐就是其中之一，场子勿断缩小，变成小旅社，门口居然卖起尿布鞋袜、刀锅盆罐等日用品，老听客路过，呒没勿摇首感叹个，书场落得如此光景，予人心酸勿已。想当年，六十年代初，书场林立，新书、中篇评弹层出勿穷，《夺印》《海上英雄》《人强马壮》《十五斤油》《李双双》《芦苇青青》等等，等等，吸引了多多少少听客。评弹勿是呒没人听，看侬是否有好个书，是否有过硬个本事，所谓响档。当年评弹名家灿若群星，而今呢？就如京剧，只要余派传人、小冬皇王珮瑜一登台，即刻爆满，北京京剧名伶名票、评论家会搭飞机来上海观赏（迭个是前几年王珮瑜勒海大剧院一次个人专场演出，笔者亦在现场），京剧有如此红热，也算当下绝无仅有了。所以，迭次中篇评弹《林徽因》受听客欢迎，雅庐书场客满，说明评弹艺术勒慢慢叫复苏，雅庐书场现在搬到黄浦区文化馆内，各方面条件上了一个新台阶，应了一句话叫“凤凰涅槃”。有一个老书迷曾经对笔者讲，希望勒辣市内多开办几家书场，当然也希望正如陈云同志所强调个那样，评弹艺术要出人、出书。《林徽因》恐怕就是蛮好个例子。