上世纪七十年代，我曾经辣海南京西路上海电视台旁边个一爿烟纸店立柜台。老巧个，石筱英就住辣阿拉店后门贴对面个石库门房子里，伊拉个灶披间对牢阿拉店个后门。石筱英是上海沪剧界著名演员，我小辰光跟了伲阿奶辣无线电里听过石筱英唱沪剧《阿必大回娘家》，伊辣戏里扮阿必大个恶去恶来个婆阿妈，印象深刻。晓得石筱英住辣阿拉店后门，阿拉店里四个小姑娘，侪靠廿岁，当年追星劲头也十足，常庄有事呒事个跑到后门去张一眼，看看石筱英辣做点啥。

　　石筱英吃香烟，伊常常到阿拉店里向来买香烟。来个辰光，伊会跟阿拉茄茄山河，不过讲个最多是，“搿爿店里几个小姑娘侪老老趣个，侬么像老底仔月份牌浪个嗲妹妹，伊么假使唱沪剧扮相一定老灵个。”讲得阿拉几个小姑娘心里向捂心得勿得了。大家侪蛮欢喜伊个。

　　当年生活用品老缺乏，交交关关物事侪要凭票凭卡计划供应。稍微上点档次个香烟是凭小菜卡供应。一户一旬四包大前门两包牡丹，大前门3角5分一包，牡丹4角8分一包。告咾，阿拉总归事先拿一条大前门一拗两，再拿掉一包，上面放两包牡丹，算是一组。来一个人买，就剪脱小菜卡浪个一只角，剪下来个角，阿拉侪要贴了纸头浪，然后作为凭证，到批发部去进大前门搭仔牡丹香烟，定量供应，相当严格。

　　有一趟，石筱英来阿拉店里搭阿拉商量，伊讲，伊吃勿惯大前门，觉着搿个香烟忒凶，吃了喉咙里向毛拉拉个，是勿是可以拿大前门侪调成牡丹。搿记阿拉有点吃酸了，一时头浪面孔也有点僵牢了。到批发部去进货，数字碰勿拢是勿来三个。搿哪能办。阿拉也晓得伊个身价，唱戏个喉咙是顶要紧个。阿拉四个小姑娘脑筋骨碌碌转了一圈，有了，拿瘪壳个牡丹香烟买拨伊。运输辰光香烟总归会有点压瘪脱咾啥，本生一点瘪壳子个香烟阿拉侪是硬劲划拨人家，常常为仔搿眼瘪壳子个香烟跟人家吵相骂，现在勿是可以卖拨伊了吗？阿拉可以跟批发部讲，瘪壳子香烟人家勿要个，阿拉只好勿剪小菜卡卖拨人家。后来批发部想想也对，每趟进货伊拉就会多拨阿拉几包牡丹香烟咾啥。搿能阿拉就拿瘪壳子牡丹香烟暗暗叫囥下来，有了几包以后，阿拉就会跑到后门口，拔直仔喉咙叫，石老师来买香烟。一听到叫，石筱英就会笑眯眯个跑过来，谢谢妹妹噢，谢谢妹妹噢，一口软绵绵个老好听个浦东上海闲话，“噢”个声音拖得老长。

　　石筱英香烟念头蛮大个，靠搿点瘪壳子香烟是勿够个。告咾，阿拉又多出了一桩事体，搭别人卖香烟个辰光，就会轧轧苗头，问人家一句，侬牡丹要哇。有点人做人家舍勿得吃牡丹，倒底牡丹要比大前门贵1角3分，会有人想拿牡丹调成大前门。就此阿拉做起了“中介”，调下来几包牡丹积起来再卖拨石筱英。不过，有辰光也会看豁边，拨人家翻白眼，触霉头，冲侬一句：我做啥勿要。呒没关系，套用现在一句时髦个闲话，阿拉终究帮石筱英圆了伊个“牡丹梦”。

　　石筱英也是蛮感激阿拉个，记得有一天伊兴冲冲拿仔四张天蟾舞台个沪剧票子来送拨阿拉，讲：“搿是我学生马莉莉个一出新戏。”

　　四十年过去了，石筱英老师也已作古，不过，石筱英来买香烟个样子，搿天伊拿票子来个样子，我是勿会忘记脱个。