小王是贵州人，垃上海推销四川泸州个一种白酒。告咾会得讲三种方言。回老家讲家乡个贵州闲话，去进货讲酒府个四川闲话，做营销就讲本地个上海闲话。

　　伊觉着方言就像一种风俗，也赛过【好像】是年轻人手里个一部“手机”。风俗是一个地方个人个共同个习惯，葛末伊垃上海介许多年了，也就习惯讲搿搭【这里】个闲话了；“手机”当然垃沟通交流当中勿好缺少个，告咾伊常庄【经常】用垃海。伊回想起来，搿眼【这些】年数当中呒啥人硬劲逼牢仔伊要去学上海闲话、讲上海闲话，伊之所以讲了老到位，用了老足准【恰当】个，完全是一个自然而然个过程，完全是像要吃饭穿衣裳一样是一种板数【必然】个需要。垃上海勿讲上海个方言，伊觉着心勿定、气勿顺、呒劲道，跟旁边头【周围】个人也轧大勿拢【不够融洽】。

　　小王迭能介【这样做】也勿是只为了做生意，因为做生意勿是人生个全部内容，外加生意场上个客户勿单挺【仅仅】是上海人，同外地人打交道个辰光，伊个普通闲话照样讲了呱呱叫。

　　小王感觉到，用所在地个方言告当地个人交流，是一种顶直接、顶快捷、顶顺当个交流。一开口大家就觉着彼此之间是呒啥隔阂个，一讲拢来就觉着情感高头是相通个。上海拨伊个美好印象，除脱商业交易重规则，八方汇流机会多，生活方便品质高，引领时尚讲文明之外，还有就是坦诚相处情意浓。搿当中对会得讲上海闲话个伊来讲，更加容易体会到上海个城市文明个气息。

　　诺，看到，伊走进了自家公司租个商务楼，叫保安“爷叔”，叫保洁“嗯【n】奶”【奶奶】，老自然个。

　　是个，是上海闲话，让伊垃拉上海过得轻松而又潇洒。