辰光过得邪气快，几股台风一刮，末伏、处暑一过，学生子个暑假就要结束；再眼睛一眨，学堂侪开学了。

　　讲起开学，我迭个七十晋六个老伯，像是打翻脱五味瓶，怀旧个情绪不由得涌上心头。对老底子读书个辰光，我真是交关想念。尽管记性越来越推板，但有几堂开学第一课还是记得煞拉思清。今朝回味起来，仍旧觉得对自己蛮有启发。

　　先讲讲眼前个开学第一课。

　　2008年起，教育部跟央视联办了《开学第一课》个节目，规模邪气大：全国中小学生侪辣电视机前上搿堂课。上课个老师与内容，更是覅忒灵哦！例如：2012年9月2日夜里八点钟，阿拉国家第一位女航天员刘洋，领头主讲“第一课”，主题叫“美辣辣侬身边”，画家韩美林、学者于丹，球星姚明等侪作为嘉宾参与。刘洋通过讲述、影像等方式，跟学生们分享了飞天路上发现个太空之美、地球之美。迭种“第一课”真实、新颖、鲜活、震撼，正能量满满！

　　再讲讲老底子个开学第一课。回想从小学到大学，我经历过勿勿少少开学第一课，除了忒枯燥、呒趣相个纯粹听报告个开学典礼之外，有两堂课一直忘记勿脱。

　　一堂是读小学五年级时柴老师个语文课。开学那天，原来个语文老师临时调脱，柴老师匆匆接班，对全班学生侪是陌里陌生个。伊想快点熟悉大家，就翻开点名册一个一个点起名来。不料，把一女生个姓“覃”（应读“琴”音），读成了“谈”音；把一个男生名字“俣俣”（应读“余余”音），读成了“吴吴”。班级里个同学侪是熟悉掰两个名字个，所以大家侪哄笑了起来。我当时心想，乃末迭记老师要“坍招势”了。呒没想到柴老师当堂承认读错，向两个同学道歉，还请伊拉两家头教给正确个读音。

　　课后我听见柴老师跟几个同事讲，因为临时接手阿拉班级，而且开学典礼后就是语文课，伊要赶到教导处拿《教学日志》，所以呒没辰光先读一遍名单。有老师辣辣旁边教伊一个“妙招”：读不出个名字跳脱勿读，等名点完就问啥人呒没点到，那个学生肯定会举手，你就问伊叫啥，伊名字个读音就晓得啦——但柴老师呒没用迭个“妙招”，选择给学生树立实事求是个榜样，赢得教室里厢一片掌声，叫阿拉大家历久难忘。

　　多么踏实、谦虚个老师啊！我后来也走上了三尺讲台，会经常捺迭段场景当做镜子，牢记“教学相长”，可见搿堂“第一课”对我个影响有多大！

　　还有一堂“第一课”是初一刚入学时邱老师上个地理课。伊刚大学毕业，长得老登样。上课铃声刚刚响过，伊就辣辣黑板浪写上自家名字（老赞个柳公权体），然后问大家：猜猜我是哪个学校毕业个？有同学轻声答：师范大学。伊讲一声“对”，又在黑板上写了两个柳体字“师范”，随后又加了“四万”两字。大家不明其意，邱老师笑笑说：“师范”两字个读音像是“四万”口伐？大家可以记牢一个数字了——地球赤道个周长（约数）就是四万千米……

　　原来邱老师辣辣第一课上巧妙地渗透进了地理知识。多么走心个教学方法！掰个知识点，我直到今朝年将耄耋了，也一点呒没忘记脱。

　　有一位哲人讲过：良好开端是成功个一半。开学第一课个精耕细作，哪怕只是几个碎片，也会给学生留下终身难忘个印象。当然，一个称职个老师，要上好每一堂课，把全部精力聚焦课堂，持之以恒，久久为功，那是需要付出一生一世交交关关个心血个。