老底子请教人家姓氏问“尊姓”，现在好像侪改成问“贵姓”了，反正就是客气么，一样意思。

　　上海闲话当中，有种姓氏讲出来邪气容易搞错脱。譬如：“王”与“黄”，“曹”与“趙（赵）”，“陈”与“郑”，还有“吴”“胡”“何”“贺”等等。葛末哪能办呢？上海人通常用“拆字法”说明，就清清爽爽了。

　　“三划王”与“草头黄”；“曲日曹”与“走肖趙（赵）”；“耳东陈”与“关耳郑”；还有就是“口天吴”“古月胡”“人可何”“加贝贺”。搿能一来就勿会搞错脱啦！

　　勿过，“拆字法”有辰光也只是拆个大概，并勿是老精确个，譬如：“曲日曹”，“曹”字上半部分勿是“曲”；还有“木易杨”，“杨”字右半部分也勿是“易”，不过，约定俗成，只要大家侪认可，也就勿成啥问题了。