上海人一直比较讲究仪容整齐，穿着整齐。其中头发相当重要，要求头势清爽，所以老早子个理发店往往贴有一些对联：“虽是毫末技艺，却是顶上功夫”“来似翼德再现，去若公瑾重生”等。虽然有眼夸张，但也是事实。

　　为了衡量理发店个技术水平，从上世纪20年代起，上海理发业就实行分档经营，同业公会制定了特、甲、乙、丙、丁5等，每等分正副两级，所以一共有10级。

　　老底子，男人头发式样有“三七开”“飞机头”“大包头”“平顶头”“学生头”等等，当然也有“光浪头”。不过因为当时监狱里个犯人侪剃“光浪头”，所以一般人勿欢喜剃“光浪头”，怕给别人留下刚从监狱放出来个错觉。另外，当时交关电影戏剧里个地痞、流氓、军阀往往顶着“光浪头”，所以“光浪头”就更加不受待见了。有趣个是，现在剃“光浪头”个人一点点多起来了，排除“光浪头”个负面标签，单从实用角度来看，“光浪头”也有很多显而易见个好处，例如无需打理、冲澡汏头方便。一些老年人头发全白，显得苍老，又不喜欢染发，就索性剃个“光浪头”，倒也让人显得精神。笔者有些朋友、同事、亲戚也有剃“光浪头”个，据说侪是迭个原因。当然，也有一些年轻人受到一些影视明星个影响，觉得剃个“光浪头”蛮酷个。事实上，眼下各种头发样式林林总总，啥样子侪有，总之想怎么剃就怎么剃，诸如“爆炸头”“鸡冠头”“锅盖头”“马桶头”侪不稀奇，甚至还有染成五颜六色个。

　　记得老早小人辣辣丙级、丁级个剃头店剃了“马桶头”，要拨同学人打头塌个。阿拉弄堂里有一个小囝，因为剃了一只“马桶头”，结果辣辣学堂里拨同学打头塌，哭了一个礼拜呒没去上课。

　　讲到“三七开”“大包头”，侪要吹风搨油个，自从有了理发店、美发厅，侪是迭能操作个。不过，后来有段辰光，理发店勿准吹风烫头发。倷末马路浪男人侪是平顶头或者学生头。可是上海男人爱漂亮体面，总归能辣辣平凡中翻出花样经。于是乎，剃头店里个“游泳头”就应运而生了。

　　剃“游泳头”对手艺要求极高，全凭修剪功夫。手艺好个理发师，勿吹风勿搨油，照样能够理出一个漂亮头型，前冲后包呈流线型，有模有样，尽显中青年男士风采，而且微风吹过，手一捋依然成型；即便下水游过泳，头发干了也能保持原样，所以起名：“游泳式”，并实实在在流行过。