A25:星期天夜光杯/上海闲话
     
本版列表新闻
     
2017年05月14日 星期日 放大 缩小 默认   
从前一手好字很关键
赵韩德
  文 / 赵韩德

  从前伲镇上个人家,对小囝个教育,呒没多少道道。啥个奥数、奖牌、证书、起跑线之类,直直叫是闻所未闻。但对一桩事体,却邪重视,就是小囝个写字。如果自家小囝写个是一笔“蟹爬字”,爷娘勿仅冒火,往往还要赏其“毛栗子”或头塔。

  所以初二时候,伲个班主任暨语文老师,勒家长会上对伲爷说,侬儿子迭位小同学各项成绩都勿错,作文也蛮好(此时伲爷听得有点神抖抖),就是字“太蹩脚”。伲爷为之一震。伊心事重重个回家,呒没按当时个惯例让我头上挨毛栗子,反倒语重心长个搭我讲了个故事。伲爷个故事有几个“关键”,伊讲解放前要勒拉社会上谋个体面职业,一要衣衫整洁懂礼貌,二是必须有一手好字。好字胜过衣衫。

  比如镇上大家侪非常敬重个黄老师——就是“正谊小学”教美术搭手工个黄老师(搭伲爷同年)。黄老师小辰光家境贫寒,其爹又跛脚。但迭位老爹脚跛脑子勿跛,晓得要让儿子出道谋生甚至“坐写字间”,识字和写字是必须个。摆香烟摊个老爹节衣缩食让儿子读几年私塾(正规学堂上勿起)。而写字(主要是小楷)老师,也是跛老爹自家寻个。

  跛老爹勒热闹繁华个洋泾古镇上摆香烟摊,常常有位老先生来买“青鸟牌”。老先生一年四季着长衫。大概怕冷,老戴一顶旧旧个“罗宋帽”。伊是清末秀才,学问全洋泾闻名。跛老爹殷勤搭徕,终于勒香烟摊上拜识了老先生,为儿子找到顶尖个小楷老师。伲爷搭仔黄老师是发小,当年曾与黄老师一起去过秀才老先生屋里,洋泾镇临大街个一幢木头房子个两楼,对面是著名茶楼“来今雨轩”。老先生家楼梯呒没光线,脚高脚低个摸索上去。屋里大窗临街,明亮,红木八仙桌上一枚砚台一个烟缸一包青鸟牌,四根红木长凳。老先生埋勒藤椅里看线装书。

  黄老师到仔做学徒个年龄,大概十五六岁。跛老爹凭勒拉香烟摊上积累个人脉,曲曲折折个托来托去,终于托人拿黄老师带到了本地大佬倌陈桂春面前。 

  老早,浦东人有事侪会找“大佬倌”。本地隔段辰光就会冒出一个“大佬倌”——称不上族长,亦呒有官职,更勿曾推选。大佬倌是哪能样出来个,本地人勿晓得也勿深究。反正总会冒出一个大佬倌,为伊拉出头,为伊拉作主。上世纪三四十年代,浦东地面,陈桂春是赫赫有名个大佬倌。

  现在陆家嘴金融贸易区高楼鳞次栉比,畅亮个大道宽阔如砥,车如流水马如龙,绿茵草坪大树林,呒有民居。但其中独独留一座上世纪二十年代建造个中西合璧个大宅第,红砖黑瓦,器宇非凡,迭个就是陈桂春故宅。后来成了吴昌硕纪念馆。

  黄老师两手空空,兜里就一张精心书写个《黄庭经》。

  陈桂春对求伊个穷人蛮客气,笑嘻嘻摸摸黄老师头,接过《黄庭经》眼睛一瞄。慢慢个讲:“我看,荐侬到正谊小学做个教书先生倒蛮好。”搿样子黄老师个人生道路就定了。伲爷说,小黄老师当时月薪十几个大洋,真了勿得!

  故事讲完,伲爷朝我看,意思是侬小子打算如何?

  写蟹爬字个初二生说爷,既然侬搭黄老师是从小要好个淘伴,葛就让我去跟黄老师学写字好?

  迭样,黄老师成了我个毛笔字老师。我临个第一部小楷帖,就是《黄庭经》。

     
放大 缩小 默认   
   第A01版:一版要闻
   第A02版:“一带一路”国际合作高峰论坛特别报道
   第A03版:“一带一路”国际合作高峰论坛特别报道
   第A04版:“一带一路”国际合作高峰论坛特别报道
   第A05版:要闻
   第A06版:要闻
   第A07版:要闻
   第A08版:目击/新民印象
   第A09版:目击/新民印象
   第A10版:家装专版
   第A11版:文体汇
   第A12版:动态/文体汇
   第A13版:文体汇/人物
   第A14版:聚焦/文体汇
   第A15版:家装专版
   第A16版:国际新闻
   第A17版:星期天夜光杯
   第A18版:读书/星期天夜光杯
   第A19版:星期天夜光杯/夜光杯
   第A20版:夜光杯/星期天夜光杯
   第A21版:星期天夜光杯/都市专栏
   第A22版:新智/星期天夜光杯
   第A23版:星期天夜光杯/译文
   第A24版:百姓纪事/星期天夜光杯
   第A25版:星期天夜光杯/上海闲话
   第A26版:快乐作文/星期天夜光杯
   第A27版:康健园
   第A28版:健康养生/康健园
   第A29版:金色池塘
   第A30版:晚晴风景/金色池塘
   第A31版:金色池塘/长命百岁
   第A32版:银发社区/金色池塘
从前一手好字很关键
也说“大沪”
吃相难看
“弹眼落睛”寻本字
盲人按摩院个奇遇
新民晚报星期天夜光杯/上海闲话A25从前一手好字很关键 2017-05-14 2 2017年05月14日 星期日