老上海人侪晓得沪西曹家渡附近有个三官堂桥，蛮有名气个。记得埃个辰光，桥是木头个，先是一座桥，后首来又有并排两座。南接万航渡路（旧名梵皇渡路），北抵光复西路，直通曹杨路，一过苏州河，大家侪习惯称“浜北”。

　　两座桥，一座开机动车，汽车开过，桥身抖动勿算，“骨节骨旮”还会发出“咯吱咯吱”个声响，叫人吓势势个。拨垃行人走个两头上下有一格格楼梯，桥面浪向有一条条缝道，便于落雨辰光漏水。阿拉小人喜欢蹲下来，从缝道里看流动个河浜水，盯牢看个辰光一长，弄得眼花绿花。木桥浑身黑颜色，是搨个黑漆柏油，看上去黑铁墨托。小辰光，老欢喜到桥浪向白相，扑垃桥下面个栏杆浪看来来去去个船。有辰光看船橹摇出来个漩涡，一只连一只，看得两眼定样样个；有辰光看撑篙船，船浪个人用长竹篙插到水里，上头用劲顶牢膈肢窝，沿老船舷大步往后走，让船朝前走。船行【hhang】到桥墩边，为了拨正航向，船家还要用带铁尖、铁钩个竹篙，戳到桥墩上，日脚【jia】一长，木质桥墩侪拨垃伊拉戳得像蜂窠【Ku】一样，看垃老肉痛个。三官堂桥周边老闹猛个。天还呒没亮，“浜北”田里个蔬菜就开始从桥上运过来，脚[jia]踏车、黄鱼车、老虎榻车，统统当作运输工具。靠近桥个两边，纺织厂交关多，南面有绢纺厂、毛纺厂，北面有国棉25厂（旧名“达丰纱厂”），工人三班倒，一到上下班辰光，桥浪向来来往往个人，像苏州河水一样，川流不息。三官堂桥风景，还表现辣桥个两边，桥南面有三官堂庙，三官堂庙勿大，香火倒蛮旺个，特别是初一、十五，善男信女，侪来烧香磕头，阿拉小人从门口朝里张望，只看到烟雾中一只只屁股翘得老高。庙旁有条小弄堂，不过二米来宽，弹格路，可以通前路脱后路。为了勿让大车子来轧闹猛，还用几块长条形个界石，竖辣两头弄口，只容一个人或者推脚踏车侧身通过。弄堂里两家烟纸店，卖眼香烛锡箔之类，生意勿推[tei]扳，忙个辰光，老板脱老板娘两个人还照应勿过来辣海。桥北面显得宽敞多了，人也勿像南面密集。因为有蔬菜批发市场、水果行，特别是装货、卸货集中辰光，有常时人声嘈杂，车水马龙。天热辰光，我常常跟邻舍几个小鬼头，一道过桥到水果行门口帮伊拉卸西瓜。结束辰光老师傅还会送几只掼碎个西瓜拨阿拉吃唻。老早桥南朝西一点个河边浪，还有大粪码头、垃圾码头，路面难免粪水横流，垃圾一天世界，此地环境龌龊得勿得了。上世纪80年代初，连得《太阳帝国》电影摄制组也看相搿个当外景地，拍得个起劲......

　　时光赛过流水，改革开放个春风吹来了。简陋、陈旧个三官堂木桥呒没了踪影，一座横跨苏州河两岸个现代化大桥代之而起，南头接江苏路，北面连曹杨路，将长宁区脱普陀区一脉相通。与此同时，桥下个流水也慢慢由黑变清。大桥两边个新建筑，更像雨后春笋，林立起来。归根到底，一句闲话，改革开放让三官堂桥个景观，变得弹眼落睛啦！