最近一段辰光，有报纸报道有人碰着交通卡拨垃调包个事体。看到迭种消息，我除脱对伊拉同情之外，还想搭伊拉出眼主意。我年逾花甲，交通卡是阿拉囡囡（阿拉囡儿还是小毛头个辰光阿拉就喊伊囡囡，一直喊了30年）孝敬个，平常辰光出门首选地铁公交，碰着辰光来勿及或者天浪向要落雨，也会乘差头。我乘差头从来勿付现钞，只用交通卡，我个卡从来呒没拨垃人家调包过，因为我有三个招数防止调包，我拉垃搿搭想讲出来搭大家交流交流。

　　第一招假使讲马路边浪有好几部差头可选择个闲话，我第一选口碑较好个大公司差头。因为搿些大出租车公司管理规范，而且拿乘客投诉当一桩大事体来抓。当然勿是讲伊拉里向就呒没“害群之马”，不过数量老少个。

　　第二招拨交通卡装封套，顶好是透明或半透明个塑料套，封口浪向贴一条胶水纸，乃末想要调包个难度实在忒大了。装好封套个交通卡勿怪乘公交地铁还是出租车侪能扣钞票。假使讲驾驶员坚持要我拿脱封套，我也勿会搭伊争个，因为我还有第三招，可以让想要调包个驾驶员彻底死脱调包个心。

　　第三招用铅笔垃拉交通卡浪向写几个字，譬方讲写自己或者屋里人个名字，或者随便啥个一串数字。我常用个交通卡浪向写www.hxshen.com.cn，迭个勿是一个网址，是我瞎写八写写出来个记号，看起来浪头大来死，实际浪向是骗骗野人头个。刷卡个辰光要让驾驶员看见搿个“网址”。下趟假使讲要退卡个闲话，只要拿橡皮轻轻揩脱就来三了。

　　另外还要记牢，下车个辰光要问伊拿发票，拒收手写发票，保留一段辰光。对于借口计价器坏脱了或者开手写发票个情况，要长一个心眼，作兴是碰着克隆车哉，因为正规出租车公司勿允许有设备故障（包括计价器）个车子开到马路浪个。必要个辰光也可以跟伊讲要去投诉，噱噱伊，想做亏心事个伊，顶顶怕乘客去投诉了。