39年前个1972年12月，弄堂里几个“赤屁股”邻居，晓得我要被分配到崇明农场去了，心里蛮舍勿得个。好坏平常一道白相了介许多年数，吵骂也好，打相打也罢，就是像糯米块搭牢年糕团一样，绕勿断来扯勿断。
12月20号个搿天下半日，伊拉3家头好勿容易凑了“一张分”（10块钱），悄悄个跑到打浦桥头浪搿家“庆丰熟食店”，第一次派头老大个买了交关熟食：白切猪头肉、酱汁豆腐干、油氽花生米、红烧烤麸、鸡汁百叶结咾啥，连得营业员也朝伊拉瞪大眼：迭几个小赤佬是发了大洋财啦？伊拉商定，今朝夜里垃拉隔壁滨海拉屋里搿间“双亭子间”为我饯行。伊拉事先还拿滨海拉外婆支开，叫伊到邻舍屋里去茄山河。搿天吃过中饭，我开始准备吃个物事：一大袋炒麻粉，满满半锅子辣酱装满2只大口瓶。炒麻粉是幽火慢炒，焦黄后拌进白沙糖，香得勿得了。我一边炒一边就想吃，勿过我屏老了，早就听阿拉早几年就去崇明前进农场的二阿姐讲过：农场吃个倒是大米饭，但是主打小菜是崇明黄芽菜，天天烂糊肉丝冬瓜汤，还勿够吃！第一年月工资18块，除脱10块伙食钿，多下来就只能买点必需个生活用品。对一个知青学生来说，还是老有吸引力个。
冬天的日头落得早，下半日5点钟快，天色已暗；弄堂里每家人家开始准备淘米烧夜饭了。滨海和建新来喊我，伊拉平常无忧无虑个，今早眼神有点忧伤：“阿良，侬明朝要跑了，阿拉今朝请侬吃顿老酒，为侬送行！”乃末我晓得了：只晓得叫肚皮饿个少年生活就此要结束了。事后晓得，12月21号搿天是毛主席发出“知识青年到农村去，接受贫下中农再教育，很有必要”号召6周年纪念日。我跟了伊拉到了“双亭子间”，见熟菜丰盛一台子，我马上跑到马路浪上买了4瓶“光明牌”啤酒凑上去，还斗胆买了一包“飞马牌”香烟。心里想：好坏今朝也算是做人了！乃末阿拉4个好朋友碰杯喝酒、风卷残云般个狂吃，就是勿碰猪头肉，其实大家侪饿得慌，老想拿搿盆平常垃拉屋里难板吃个猪头肉一扫而光啊！阿拉好像一夜之际成熟了，互相谦让……阿拉一人一根“飞马”，肆无忌惮抽了起来，呛人个烟雾缭绕垃双亭子间狭小个空间。我提议大家吃猪头肉，一歇歇工夫，盘子见底，阿拉四个人个面孔浪荡漾起从来呒没有过个满足感！
当年个猪头肉是珍贵个，时隔毛40年，猪头肉好像又吃香起来，勿过现在再多再美个盛宴，总归比勿上当年搿顿10块洋钿个饯行宴啊。
