老上海人侪晓得，上海滩有个十六铺码头。老早搿搭邪气闹猛，勿管是货运还是客运侪老繁忙个。码头浪向停靠个船一只接一只。乘船个人多得来勿得了。岸浪向各种商号、店铺、仓库林立，车来人往。

　　清代乾隆以后，海禁开放，上海港由于优越个地理位置，已经成为当时中国南北洋航运贸易格联结点。当时有文献搿能介记载：“凡远近贸迁皆由吴淞口进泊黄浦”。搿个辰光，十六铺码头已经是中国最大个港口之一了。 

　　地名学上“十六铺”个出现，是垃拉清朝个咸丰、同治年间。当时为了防御太平军进攻，上海县拿城厢内外个商号建立了一种联保联防个“铺”。由“铺”负责铺内个治安，公事则由铺内各个商号共同承担。最初计划划分27个铺，因为种种原因实际只划分到了16个铺（即从头铺到十六铺）。而其中十六铺是16个铺中区域顶大个，包括了上海县城大东门外，西到城濠，东到黄浦江，北到小东门大街搭法租界接牢，南到万裕码头街搭王家码头街。1909年，上海县实行地方自治，各铺随之取消。但是因为十六铺地处上海港最闹猛个地方，客运、货运集中，码头林立，来往旅客搭上海居民侪拿搿搭称作“十六铺”。作为一个地名，搿个名称也就一直沿用到今朝。 

　　十六铺码头历史浪就是有名个金利源码头。伊由美国旗昌轮船公司垃拉1862年建造。1877年旗昌公司拿码头个全部产业侪卖拨轮船招商局，改名南栈，又叫招三码头。抗战个辰光，招商局又拿码头卖拨美国卫利韩公司，改名叫罗斯福码头。太平洋战争爆发后，码头拨日军占领，改名叫江西码头。解放后再叫十六铺码头。老早十六铺码头个船可以到四面八方。到长江里向各个港口，到宁波、温州等近海港口，侪可以去个。外国港口也可以去个。据史料记载，1919年4月个一日上半日，湖南新民学会个一批学生20多人就是垃拉十六铺码头上船到法国去勤工俭学个。据说当时毛泽东也去码头送行。老早垃拉十六铺搿搭也发生过交关故事。据资料记载，上海大亨杜月笙14岁个辰光初到上海，就是垃拉十六铺鸿元盛水果行当学徒个。还有一个上海大亨黄金荣进了巡捕房后，做了包打听，也经常垃拉十六铺一带活动。伊常常一身便装，一日到夜泡垃拉茶馆店里，吃茶吹牛，收集情报，联络眼线。还有一桩大事体，就是“江亚轮”事件。1948年12月3日，满载客货个“江亚轮”垃拉长江口爆炸沉没，三千多人遇难。搿个是垃拉旧中国发生个第一大海难。当日下半日4点钟，搿只“江亚轮”就是从十六铺3号码头起航开往宁波个。

　　1982年，由于设施陈旧，拿原来李鸿章创办个招商局仓库拆脱，造个十六铺新客运站一时轰动上海。我搭十六铺码头也有交关个情结。读书个辰光经常到码头浪向参加劳动，推车子，装卸货物。1968年12月1日，我也是垃拉十六铺码头乘“前哨1号”轮到崇明农场去个。上调到港务局后，也经常到码头浪向去参加劳动，联系工作。十六铺一度淡出了大家个视线。现在个十六铺除了作为黄浦江水上旅游中心外，还具有公共滨江绿地、大型商业餐饮搭大型停车库等各种功能。