最近，辣屋里整理老早收藏个旧报刊杂志时，发现了一份1963年8月份个《大世界》节目单。大世界过去曾一度被誉为远东第一大游乐场，外省市人来上海，有一句闲话叫：“不到大世界，等于没有到大上海。”所以说，大世界老早地位是老老高个。记得小辰光，顶喜欢白相个地方就是大世界。跑进大世界，首先吸引侬个就是哈哈镜。一排哈哈镜，照迭面，成瘦子，照伊面，成胖子，各种怪模怪样姿态表情让侬熬勿牢哈哈大笑。而大世界里向一个个演出场子，日夜勿停演出各类戏曲、电影、音乐、杂技等等，更令人目勿暇接。买一张票子进去，可以从日里看到夜里，要看啥就看啥。

　　我翻出来个迭份节目单还是我二十岁时去白相大世界时留下来个。搿搭我介绍拨大家看看。迭份节目单16开大小共4页，红色铅印。节目有：京剧，日场由新华京剧团演出《狄青大闹万花楼》，主要演员有李建春、田予倩、施正泉等。夜场由上海京剧院青年演出。沪剧，由群艺沪剧团日场演出《双推磨》等小戏，夜场演出《斗争没有结束》，主要演员有吴鸿章、顾曼君等。电影，《七天七夜》。锡剧，由红旗锡剧团日场演出《悬崖勒马》，夜场演出《三拜堂》。越剧，由春泥越剧团日场演出《僧帽计》，夜场演出《双珠凤》，主要演员有筱月英等。淮剧，由志成淮剧团日场演出《借当》等小戏，夜场演出《假婿乘龙》，主要演员有何小山、赵美英等。木偶剧，由上海市木偶皮影剧团日夜演出《猪八戒学本领》等。评弹，由江南评弹团、凌霄评弹团日夜演出。五楼屋顶花园夜场由上海民族乐团演出江南丝竹、男女声独唱、二胡、笛子独奏等。其他还有杭州曲艺团、红霞歌舞团、红色杂技团等演出。侬看，一天个节目几化丰富多彩。

　　令人遗憾个是，如今大世界已关门空置有二十多年了，迭能个黄金地段，迭能个辉煌历史，竟然会被“抛弃”几十年，实在让人叹息啊！阿拉翘首以待，大世界能以崭新面貌重现辉煌。