小辰光读地理课，讲上海处于北温带。气温四季分明。春、夏、秋、冬各有四个月左右，大家勿吃亏。天热天冷好像就是以搿样子个区分来过个。春天暖洋洋，掼脱老棉袄，穿上长袖长裤去春游。热天热煞人，日里向赤膊短裤木拖板，夜里向弄堂里乘风凉。秋天最适意，凉风习习看蓝天白云，半夜里黑灯黑火去翻墙头捉蹔【she jik】。上海个冷天阴势势，冰也结得、雪也落得。见过零下几十度个东北人到上海过冬会吃勿消。冷到骨头里，穿了皮衣皮鞋也吃勿消。一年四季里，有交关上海闲话来形容天气。春夏之交，有黄梅天。黄梅天阴雨勿断，上海人讲落长脚雨了。小雨是毛毛雨，大雨是阵头雨。丽日当空落雨是太阳雨。下雨打雷有霍险。霍险是云里闪电。上海个小囡都拨屋里向大人、老人吓过：“霍险就是专门打坏人、坏小人个!”梅雨天气温度高、气压低，叫人呴势。呴势写得通俗一点明白一点，可以是吼势。辣旧上海也有文人拿伊写成吼狮。吼得像一头怒狮，很生动个。吼势难以形容，所以上海人会讲胸闷气短，吼煞。

　　到了大热天，上海人欢喜风凉。到了大冷天，上海人欢喜暖热。温暖了，暖和了，就是暖热了。“天热了，穿得风凉点。”“天冷哉，要焐得暖热点。”四季分明使上海人备足四季服装。春天，中山装、茄克衫。夏天，短袖衬衫和尚领。秋天，绒线衫、棉毛衫。冬天，派克大衣、羽绒衫。到啥个山唱啥个歌，到啥个天气穿啥个衣裳，上海人很讲究个。

　　现在，四季勿分明了。热天长起来了。冷天也长起来了。春秋天被压缩了。近十几年里，大家是脱下冬装就换夏装。退下T恤、裙子就上冬装。春天阿里去了？秋天又阿里去了？凡到季节替换个辰光，交关老上海人会迭能谈论天气：“今年个天气又勿正常了。隔忙头里热煞，隔忙头里冷煞。弄勿慬，吃勿消!”其实只要关心天下大事，就可以晓得世界气象都常有反常现象。热天热煞变成热天冷煞，冷天冷煞变成冷天热煞，南北半球都有发生。最好个准备是衣橱里挂好一年四季个衣裳。每天早夜关心天气预报。时时刻刻可以拨打12121气象报告台。上海气象台还呒没以上海闲话来发布天气预报。勿然，上海闲话里个阴势天、落雨天、还潮天、风凉天、殟塞天、吼势天、邋遢天要叫交关新上海人头昏落苏个。