现在小囡书包侪老重，每天背仔一书包书去上学，读点书真勿容易。其实,阿拉小辰光个书包也是勿轻个。

　　上海一解放,我就进学堂读书了,伊个辰光书包里只有两本书,一本是算术,一本是国语(即语文),侪勿算厚,按理讲书包并勿重。其实勿是搿回事体,书包里还有一块比书重得多个石板。迭块石板是上课个辰光,垃拉课堂里练习写字或者做算术打草稿派用场个。由于当时纸张生产紧张,草稿纸稀缺,告咾刚刚读书个小学生,书包里侪要带一块石板。

　　石板比书稍许大一眼,是用黑色片状石头做个,比现在个窗玻璃厚点。为了拿进拿出方便,同时防止石板个边角划伤手指,刮破书包,四周侪用寸把宽个木条框牢。石板用个是天然石头，又是手工加工,所以每块石板个尺寸虽然一样,但厚薄侪勿一样,厚点个就重点,相反就轻点,一般爷娘侪欢喜为自家小囡挑块轻点个。石板垃拉当时个文具店或者是学堂门口个地摊浪侪可以买到。书包里放进迭块石板,份量哪能会轻呢?要是碰着写毛笔字个日脚,还要带一方也是石头做个砚台,书包就越加重了。

　　垃拉石板浪写字用个是石笔,石笔比手指长点,比筷子细点,是用天然浅色石头切割出来个。迭种石头又滑又软,像铅笔芯一样,磨成粉末就是阿拉熟悉个滑石粉,用石笔垃拉石板浪写字,勿但经用,笔迹清晰,而且呒没像粉笔一样个粉尘,邪气环保。不过,石笔容易断,但只要捏得牢,一眼勿影响书写。

　　阿拉小辰光个书包,店里买来个一般是用细帆布做个,假使单单放几本书,倒也呒没啥问题,要命个是搿块石板天天要用,一眼勿好脱班,放垃拉书包里要天天背来背去。小辰光侪欢喜白相,放学以后,大家背仔书包蹦蹦跳跳,垃拉回屋里个路浪向也勿太平,相互侬追我赶,石板就垃拉书包里颠来颠去,辰光一长,勿但书包带子老是断脱,书包底部个两只边角也容易磨破。限于当时个家庭条件,一般爷娘侪舍勿得再买新个,只好补仔又补,搿个辰光,勿仅是“鞋儿破,帽儿破,身上的袈裟破”,而且是“背着的书包也是破”。阿拉个爷倒是蛮会想办法,勿晓得从啥地方弄来一块人家从帆布床浪拆下来个粗帆布,又厚又牢，就请人定做一只书包。迭只书包勿但书包带,而且书包底也侪是双层个,牢是牢仔交关,但是份量也比老早重仔交关。我迭只书包,是当时班级里最牢最重个,一直用到我小学毕业都呒没坏脱。后来我长大了,有人讲我个背有点驼,勿晓得阿是同迭只书包有关。

　　石板是阿拉读书辰光个必备文具,刚刚开学个辰光大家侪一样,一个学期下来就变得五花八门了,尤其是男同学,几乎呒没一块是相同个，有木框散开,用鞋底线缚牢个;有勿当心碰碎脱,当中有几道裂缝个;有木框勿翼而飞,连石板也残缺勿全,只剩一块稍许大点勉强对付使用。好垃石板便宜,到仔新学期开学,大家个书包里又是一块新石板。

　　后来随着国家发展,生活水平个提高,草稿纸已经勿成问题,呒没多少辰光,石板就逐渐被淘汰。但石板留拨阿拉个印象却是邪气深刻。