马路浪上乱厾物事、乱掼垃圾个事体越来越少见了。上街沿、下街沿全部拨清洁工人收拾得清清爽爽，再要厾只香烟屁股、掼只塑料袋袋真有点勿好意思哉。上海闲话里呒没“扔”个讲法，扔垃圾是讲成掼垃圾、厾垃圾。厾是从苏州人伊面学习过来个。上海闲话里吸收了交关方言，因此上海人搭苏州人攀谈起来是呒没多少障碍个。掼辣上海闲话里有好几种意思。一是同扔、同丢。二是同跌同摔。老伯伯摔了一跤，上海人是讲老头子掼脱一跤。掼跤等于摔跤。到了体育比赛里，掼跤就要讲成掼煞跤。掼煞跤是有比武个意思个，勿是乱来一气个打相打。掼个再一种解释是搁置个意思。“搿部汽车一时头修勿好，先掼辣一边再讲。”搿句闲话里个掼一定勿是扔勿是丢勿是抛弃。拿一部汽车掼脱，派头也太大了。

　　上海人个家庭里向很少有“家暴”个。屋里向吵相骂双方都是动嘴勿动手个。上海人夫妻之间个矛盾爆发个顶级状态是有一方开始掼家生了。上海人家可以掼个、厾个家生也只是锅碗杯盆。声响老大，损失勿大个。还呒没见到过有掼电视机个。老式个电视机太大太重，呒没点做过重生活个力道还抬勿起几十吋个电视机个。吵相骂个两方一道发脾气来掼家生个也勿多见。男女齐上阵来东扔西砸是外国人个派头。掼家生可以算是掼派头一种，是掼拨左邻右舍看个，是老上海弄堂里个常规演出。现在上海人搬进小区、住进高层，大家少来往了。掼一通家生是呒没人看、呒没人劝，无人喝彩。搿样子个故事几乎绝迹了。掼还有交关发噱个闲话。“掼侬三条横马路”，意思是要比侬好得多、高明得多。“掼纱帽”，是指一时气恼而撂担子，老子勿伺候人了。“掼派司”，是亮出证件、显示身份。“掼派头”，是讲究起排场、显露出能耐。一掷千金做勿到，至少也来洒洒百金。“掼炸弹”，明个是指打仗飞机扔下炸弹，暗个是指出恭上厕所。最最结棍个掼是“掼浪头”了。上海人讲别人家牛皮大是以浪头大来形容个：“小赤佬浪头大来西，实则上是空麻袋来背米，勿好上伊个当个！”可以拿浪头一把捉牢拎起来掼一记，水花溅人，足可以见得掼浪头个有多大个本事、有多大个能耐了。所以碰到撞到有掼浪头功夫个脚色还是避一避为上策。惹勿起，躲得起。是也。