老爷车一指古典车、古董车，是值铜钿货，但迭搭块讲个是另一个意思，就是蹩脚、老旧、破相、毛病交关——老早点，上海公交路浪跑个勿少就是搿种现在标准来看超期服役个老爷车子，迭个也告以前底子薄关联。该淘汰勿淘汰，半当中故障、抛锚也就避免勿脱了，碰到搿种情况，过来人侪晓得，驾驶员首先会拉起座位旁边个发动机大盖子，作简单检查、修理，修好继续跑，要是仍旧发动勿起来，就会像照片浪搿能请乘客们下车帮忙推了发动起来，当然也可能还是发动勿起来，葛末就彻底息搁、抛了路浪向了。好辣伊辰光路浪机动车还勿算多，摆到现在个密度，就难免要发生交通“肠梗阻”了。陆杰 摄 林庸 文